Engemaw kan tih tak ang le?

Mihringte hian duthu kan sam a rem kan ruat thin. Kan hmalam thu-ah zawng thu kan van neilo lulai em. Hun chep tak karah Thesis ziahzawh tumin theihtawpin ka bei ve a. Hyderabad Mizote Ni alo thleng a hmanlo inti takin kan hun tawpna te ni dawn ve bawk a tiin ka va kal ve a. Prog hlimawm tak tak kan hmang a, kutinbuanah chuan teltur an awmloh avangin telve turin min ruat a, vawi 2 lai ka pha thiante'n ka trang hmelchhelai hmuh an chak nge a rukin anlo thehlut a. A tawi zawngin final-a mi chaktak Goliatha ang mai a thahrui ngah hnehlo chuan ka ban ka ti tliak ta rawp a. Chhunzawmthei ka ni talo, hospital-ah min phur a an zai ta hial a, kar tamtak bawksawp a ngai ta.. ka tihtur ka ti theilo a, thiltih tur in kam teuh chungchuan tlangval pumpa ka hahchawl ta der der mai a ni. Doctorin kut exer lak zeuh zeuh a ngai a tih avangin he thu hi ka ziak ta a ni.

Enge kan mamawh le?

Tulna avangin reitak NET ka peihlohsan hnu in ka blog traffic ka en a, "Tears language well spoken" tih ka ziah chu a hit tam ber a ni a. Ka thiante hla post ka en a "Love the way you lie" tih Rihana leh Eminem sak ka hmu bawk a, chuta ka ngaihtuah chu hei hi a ni "Khawvelah hian enge kan mamawh?" Hlim leh lawm duhin kan theih theih kan ban a, a tawpah chuan tahna mai a lo ni leh si a! Enge famkimlo awm ang a, enge kan dai sual tak ni ang?

Rilru-ah pai a awm a, pawn lamah chuan nui mahse a chhungril a rum si. Mahse han ngaihtuah teh lungngai thei, tap thei i ni chu mihring special tak i ni tih lanna daih a sin. Nui liam mai thei, engah mah ngai ve ngailo i nih chuan mihring lainatna neilo lungtum ang mai a thinlungsak leh nelawmloh i ni ngei ang. I kawngzawhlai chu enletla i tihsual a awm chuan ti tha turin in fuihla, mahni inrintawkna nei la, i hlauh tak mai chu han hmachhawn teh le. Chu harsatna i hmachhawn thiam dan a zir chuan mihring takzet i nih theih zia a rawn hril dawn a ni. Kan khawvel kawng zawh a bumboh hian vawn chhan kan zawng a, kan tlu dawn mai thin. Mahse han hawichhuak ve teh khawvel hi a mawi a nia, tanpui che chakin engkimti thei Pathian chuan a ban reng che a, i chaklohna lai enreng ai chuan i chakna chu i en zawk mai dawn nia. Natna leh lungngaihna hremi mihring kan nih tlat avangin kan inlainatna leh hmangaih tawnna te hi a lo lan chhuah tak takna chu kan mittui leh lungngaihna-ah te hian a ni fo thin!

Thenkhat te'n hlimna dang zawngin zu te an rui chiam a,an han ruih chhung chuan an rilru chu a dam ve ngei mai, mahse an han harh a angai tein an thinlungna kha a lo pun a, a lo bo aw zawnglo mai. Nun beidawngin thenkhat chuan an nunna hlutak an ti tawp a, a pawi ngawt mai. Thenkhatin sum leh paiah an tlan a mahse hlimna tluantling chu a lo lei thei ngawt silo. Keini ai a tamtak a nei film star te nun kan enchuan nunkhawharna chiang takin kan hmu a, an awhawm silo. Nakina hlim chawp tur a nilo tunah hian hlim chhan damchhan i nei ngei tur a ni. I nun kawngah i lo kal sual tawh a ni pawhin "Jesus takes the wheel" ti la, i nunah danglamna a awm ngei ngei ang.

Arundhati Roy-in min rawn tlawh!

Thlirtu mipui tamtak zingah

Thil te tham te pawh hmaih ngailo Siamtu chuan a rel fel ngei e, chuta zinga a duan hringfate zingah chuan hmeltha bawk a, thuziah thiam bawk Arundhati Roy hi a tel ve ngei ang. “The God of small things” a ziah avanga kum 1997 Booker prize dawngtu Bengali nu ni si India hmarchhak Shillong-a pianga, Kerala a cheng ta chuan Monday chhun khan kan awmna university-ah min rawn tlawh a. Shekhar Kapur film siam Bandit Queen, Phoolan Devi chanchin tarlanna a rawn sawisel avang a khawvelin an hriatchhoh. American linguist (The living intellectual) Noam Chomsky te dungthula thu rawn ziak a, media te’n an tarlan lemloh "a tak ram" a rawn auchhuahpui avangin he nu hi atakin hmuh a chakawm a ni.

Vice Chancellor Prof. Seyed Hasnain in lecture a chair
He nu ropui tak hi la hmulo mah ila a thuziak atangin kalo hmelhriat ve thin a. “The Algebra of infinite Justice” leh “The God of Small Things” te kha ka thianpa Sawmtea (RIP) Shillong-a kan awmlaiin ka hawh sak ve tawh. “An Ordinary person's guide to empire” a ziah tho kha ka rauh em em thin a, ka thianpa in min hawhbo sak a ka duh em avangin ka lei leh nghe nghe. Chutiang taka thuziaktu ka ngaihsan ve chuan min rawn tlawh dawn a ni. Zanah mengrei mah ila zingah ka tho a, ka thianpa tuitaka mu pawh chu kaitho lo leh dil miahlo in a camera ka lek chhuak a, lecture a pekna tur hall-ah a thusawina tur hmatakah thutna ka va rem a. Kan university professor te pawh a belkai deuh chin chu karloah an rawn fuan khawm a, lecture hall-ah chuan kan leng talo! Chhuat rem lai laiah te an thu ther fir fer hlawm a.

Ngaisangtu leh hnialchak mipui hma-ah huai takin
Anti-globalization/alter-globalization movement te, neo-imperialism a fakselna te, Global policy of US a sawiselna te, Narmada Dam lian sorkarin a tum mirethei zawkte’n an tawrhna te chu a thupui ken ber thin a ni a. Operation Green hunt chungchang pawh a thai nual tawh nghe nghe. Chutah! Ka hma-ah chuan a rawn ding chhuak a a hmel pawh a tha kher mai, media a sir a a thusawi thla lo la mawlh mawlh te kap chung chuan thu a rawn sawi tan ta a. Thusawi a thiam kher mai, a tawngkam chheh tin reng a fimkhur a, a khap sual duhlo khawp mai. Media-in a "reality" nilo an puanzar thin te, India ram sorkar chak tak mai chu corporate te control a nih zia leh Prof Kancha Ilaiah in a sawi hnamsang zawk "gundas" te chu dim hauhlo in a rawn kap a. India ram chuan a ram ngeiah militarism hmangin indo a puang a mirethei te a nghaisa a ni a rawn ti zel a, thudang tamtak pawh a sawi duh tawk ang. A bengvarthlak khawp mai.