Hmangaihna a din “Hyderabad” Part - I

"No man is an island" antia lawm, mahni chauh a awm theilo hringmi te hian nitin khawsakna in a mamawh avangin khawpui kan din thin. Khawpui chu a te emaw a lian emaw pawh nise hmangaihna a awm chuan chen a lo nuam thin. Chuvang tak chuan mahni a awm theilo mihringte hian kan khawvel a lo nawm leh zual nan mite hmangaih theihna kan mamawh a, a hmangaihna dawng sawng thei tur pawh a kan in puahchah pawh a ngai a ni. Hyderabad khawpui pawh hi hmangaihna avanga rawn in din a ni a, bomb puahna hmun pakhat mai a nilo tih hriat a tha hle a ni. Hmanlai hun chhuikir ila,Ibrahim lal hnu khan a fapa naupang kum sawmpanga mi lek Mohammad Quli Qutub Shah chu kum 1580 khan a rawn lal a. Naupang hle mahse apa ram zauh bak te rawn la chhunzawm zelin ram ropui leh zualah Golconda chu a rawn hlang a. A hmangaih em em Hindu lamthiam Bhagyamati hriatreng nan Bhagyanagar khaw ropui tak a din a. A hnu a fapa Hyder a hming chawiin he khua hi “Hyderabad” tih a lo pu chhunzawm ta a ni, thenkhat sawinaah chuan a nupui kohduatna “Hyder Mal” hming chawi a sak a niin an sawi bawk.

Chanchin ngaihnawm tak mai Hyderabad tih hming lam hian a awm thin a chu chanchin chu lalfapa Mohammad in a lal fanu ngaizawng lo a lamthiam satliah mai a ngaizawng tlat mai hi a ni. A pa Ibrahim hian he thu hi a hriat veleh khunkhan takin a zilh hau a, lal nihna zahawmzia leh chutiang ang chhungkua vek a mi chu nupuiah pawh a nei tur a ni tiin a zilh a. A ngaihzawng hnen atang a rilru a lak pen sak nan Persia atang te, Arabia atangte in nula hmeltha “kei ka ni” tih zawng zawng a chah khawm a, mahse Mohammad lungdum zo an awm lo. Zankhat phei chu ruah nasa takin a sur a, kawl a phe zuai zuai a, kulh chhung a kalh hnan lalfapa chu a in sum zo ngang lo ni tur a ni, kulh bang sang tak lawn liamin Musi luipui a kan a, sakawr nen a ngaihzawng Bhagyamati awmna a va thleng a. “Ka Lalpa, heng ang zan thimah te engtin nge i rawn kal theih le!?”tiin in a lo zawt a. Mohammad chuan, “Ka duhlai, nangmah ka hmangihna che hian ka kawng chu a chhun eng mai a lawm.” tiin a chhang ngat e, an tia lawm. A pa Ibrahim pawhin chutiang chanchin a han hriat meuh chuan a thinlung sak a hawng ve ta a, an pahnih a inneih chu a rem ti ta ni awm a ni.

Kum 1612 khan Mohammad Qutub Shah chuan lalna a rawn chang ve leh thung a. Hyderabad-a awm turin Persian sumdawng tamtak chu a sawm a, an thlah kal zel te chu Mehdipatnam leh Old City vela kan hmuh thin te hi an ni. Kum 1593 khan Charminar leh Jama Masjid hi a sa a. Charminar hi hrileng (smallpox) umbona hriatrengnan a sak a ni. Musi luipui a khuah a, mipui te tan in tur a pe bawk. Mohammad Sultan Nagar din chhuaktu a ni. Sakhuana la urhsun thei tak a ni a, Mecca Majid hi ama sak a ni bawk. Ral rel thiam tak a ni a, Mughal ho in Sultan of Ahmadnagar an rawn run khan a remhriatna in Mughal ho kha an hnawt kir nghe nghe a ni. A pa ang tho in thu leh hla a ngaina hle a, mi lungleng thei ve tak a ni bawk.(To be cont'd)