Kum 1966 Johns Hopkins University colloquium-a "Structure, sign and play in the discourse of the human science" tih a pek avang a western philosophy kal tluang lai rawn chhem nghingtu hi pa namai a nilo. Kawm phak a ka in ngaihlo avangin a lekhabu leh article ziah te hi ka ban ngailo. Tun hnai khan ka bih ve ta chauh a, a lo ropui ngei mai. He pa thusawi tum ni a ka hriat te ka han thai mai mai teh ang.
Juda mi rawn piang in a hunlai a a chipui te tihduhdahna chu a rawn tawm ve nghal a. School a kal hmasak berna ah juda mi a nih avangin hnawhchhuah a ni a. A tetlai a a tawrhna hian a hnu a thurawn ken ber central leh marginal tih hi a rawn irh chhuah phah ni in a hriat. Foot ball star nih a professional line kal a tum a tling thei silo chuan philosopher lehkhabu lamah a awntir ta zawk a. Nietzche, Rousseau, Gide, Saussure te a chhiar nasa thin hle.
Khawvel in lum let?
Khawthlang zirna pakhat structuralism an tih chuan philosopher te rilru a kuai hle. An ni ngaihdanah chuan thil engkimah hian ramri kham tu ruangam a awm a ni. Science lamah hmasawnna a lo awm bawk a, a thusawi nemnghehna turin chu thiamna chu an senglut bawk. Chutiang hmasawnna lam a khawvel thiamna a buk suau suau lai chuan an thurin chhem nghing turin Derrida a thian te Roland Barthes, Gilles Deleuze, Felix Guttari, Michel Foucault te'n theory pakhat Post-structuralism tih chu an rawn au chhuah pui ta a ni.
Enge deconstruction chu
Derrida aupui ber chu deconstruction siamtharlehna kan tih hi a ni. Derrida ngaihdan chuan khawthlang mifingte ngaihdan hi centre pakhatin hual velin a sawi a chung te chu- a lo chhuahna, Pathian awm rinna, thudik,thil lo la awm tur, intawhkhawmna. Hengte hian thilawmzia zawng zawng chu sawifiah an tum ni in a sawi. Entirnan Khawthlang khawvel thlirna chu Christian na centre ah hmangin engkim mai teh a ni a, Hindu lalna ramah India-ah te pawh an thurin kalpui Casteism hmang a teh vek a ni. Chutak mai a centre lai zuk sawn a, Christian emaw Hindu nilo lam atang a a centre kha i thlak chuan awmze dang nei thei dawn a ni. Grammar rules ah pawh nise a central word zukthlak a han remsawih khan a awmzia alo dang thin chutia tihna chu deconstruction a tih chu a ni.
Ani ngaihdanah chuan thil pakhat a awm chuan a dang pawh a awm thin entirnan mipa/hmeichhia, christian/jew, thlarau/tisa. Pakhat zawk centre a hmang a thil engkim i sawifiah chuan a leh lam chu neksawr an ni ang a aw an chhuah ve theilo ang. Mipa lalna khawtlangah chuan mipa kha alai a ni a hmeichhia te thu leh hla chu neksawr/marginalize an lo ni tawh ang. christianna a engkim teh chuan Christianlo thu leh hla chu thu dik lo pawmawmloh a lo ni tawh ang. A tet te tang a an anchipui te tawrhna a tawmpui ve avangin chaklo zawk leh hniam zawk a te dawm kan hi a rilruah a lian hle a nih a rinawm.
Chutiang a lo nih takah chuan thlirna tlang a lo dan hian khawvel kan pawmdan leh hmuhdan pawh a lo danglam tawh thin. French structural anthropologist Levi-Strauss chuan language pawh hian structure/ruangam an nei vek ni in a sawi a. "The raw and the cooked" ah chuan hnam pakhat Bororo thawnthu grammar ziak turin a fehchhuak a a han zirchiang ta a. An thawnthu ah chuan dan khat hmang a teh theih a ni hauh lo a lo hrang vek mai tih chu. He thutak hi Derrida rawn sawi chu a ni ruangam/centre pakhat a awm theilo a hnam hrang hrangte'n kan hmandan a zirin a danglam thei bawk. Entirnan english grammar danah chuan noun hnuah adjectives dah thin a ni a, French ah chuan a ni hauhloa in kawkalh thung, a nih english rules of grammar hi central a hmangin hnamdang ziahdan hmang zirnan hmang tala a tawpah thu awmze awmlo i chhuah ngei ang. Thumal reng reng chu a awmna hmun a zirin a thukawh a danglam thei noun a nih chang a awm a verb a nih chang pawh a awm. Helai a a thuken ber chu thil engkim mai hi text in a rawn sawifiah a ti ta a ni.
Enge ropui zawk? Thusawi leh Thuziah? Rousseau chuan French khawtlangnun tawp lutuk chu thil thalo tak a nih thu a sawi a, Pathian thil siam khuarel nature chu thianghlim leh tha zawkin a sawi a. Metaphysics of presence chu thusawi ah hian a awm tih a sawi. Thusawi leh a awmzia hi thiangrialin a sawi.Thuziah erawh chu a chhiartu in a ziaktu a hmuhtheih tawhloh avangin tangkailo zawkah a dah a. Thusawi chu a sawitu ngei in thiam taka a sawi avangin a fuh zawkin a sawi. Structuralist Saussure chuan hemi sawifiahna tur hian ti hian a lo ti bawk a. Bawng hi lo awmta se, bawng ti a i lam khan a ri khan sign a siam a signifier sawifiahtu a ni a sawifiah a signified chu bawng kha a ni. Rousseau ang tho in thusawi chu dik zawk leh chak zawkin a sawi a, thuziah chu a hnuhnung zawkah a dah. Entirnan-
"Atirin thu a awm, thu chu Pathian hnenah a awm, thu chu Pathian a ni."
Thu kha a hmasak zawk avangin thudik a pawm a ni, Pathian rawn sawifiahnan a khawvela rawn tirh signifier chu Isua a ni a signified chu Pathian a ni. A chhan chu mihring zingah a ei in a in a, thu a hril thin. Chutia nih chuan ri/sound chu an dah pawimawh ta a nih ber chu.
Derrida chuan thusawi central hmang a, thuziah hnawl a nih chu a rawn sawi sel a. A ri hrim hrim chuan thilnihna sawifiah ni ta se, dictionary keu ta la bawng tih pawh chu a sawifiah turin thuziah hrang hrang i hmu ngei ang. A sawifiah zo chuanglo! Thuziak textuality erawh chu a chhiartu a zirin a danglam thei a chuvang chuan thilsawifiahnan chuan powerful zawk ni in a sawi.
Sakhuana thurin a chhem nghing thei em?
Awle, a theory laimu ber mai chu thudik kan tih hi thuziah play mai a ni a a thlirtu a zirin a danglam mai a ni tih a ni a."Keimah hi kawng leh thutak leh nunna ka ni" ti tu hi an hnial ta em ni le? Tha leh thalo ramri kan kham an rawnthiat a tuai/patil tan hmun an hawng a. "Thiangzau era" ah min hruailut mai a nilo maw? Nge Pathian chatuan ruatah hian pakhat zawk hi a central reng ang a pakhat hi awpbeh a ni ang? Khawvel tawp dawn a finna te a pung ang tih te hi a lo thleng mek em ni le? He theory hian ngaihtuahna tamtak min siam tir.. duh tawk ang a sei.
Exercise
He picture hi han click chhin teh eng e i hmuh le?
Thil pahnih hmuh theih pakhat chu face/hmai a ni a pakhat lehah chuan candle a ni. Facist tan chuan hmai chauh hmuh kha a awl hle a, candlist tan pawh chutiang tho chuan. A awmzia chu thlirdan chi hnih a awm tihna mai a ni. Dik zawk central authority a awm thei talo! Thutak chu enge ni ta ang le?
Derrida work te chhiarzau duh tan-
Dissementation.tr. Barbara Johnson (U Chicago P, 1982)
Of Grammatology. tr. Gayatri Spivak (Baltimore: Johns UP, 1976).
Writing and Difference. tr. Alan Bass (U Chicago P, 1978).
Margins of Philosophy. tr. Jonathan Culler, et al. (U Chicago P, 1981).
Specters of Marx. tr. Peggy Kamuf (New York: Routledge, 1994).
Speech and Phenomenon. tr. David Allison (Evanston: NorthWestern UP, 1973).
No comments:
Post a Comment