Dik tak zelin le...

Ram leh khawtlang kan vei tlang. Kumin kan Beirual Thuzir pawh chutiang lam hawi zawng chu a ni. “A rau lo” ti tawk lah kan bo lo. Eng chu nge rau a, eng chu nge rau lo? Hei hi zawhna pawimawh tak a ni. Kan thlarau chan hian kan nitin nun a nghawng siloh chuan kan ram leh hnam chu a nghawrnghing har ngawt ang. “Thlarau rah erawh chu hmangaihna te, hlimna te, remna te, dawhtheihna te, ngilneihna te, thatna te, rinawmna te, thuhnuairawlhna te, insumtheihna te a ni zawk e (Gal, 5:22). Pathian a hlimna lam piah lama nitin kan nun a kan hmanchhuah chi vek a ni.

Kan ram leh hnam hian veitu/sawitu tamtak a lo nei tawh thin mahse tha thawh te chu tlem te an ni. Kan kohhran hruaitu zingah pawh hian kohhran vei em em si ram vei pha silo kan awm thei bawk! Kan thlarau chan hian Biak In zawl bak a pel theilo a nih chuan a pawi thlawt a ni. Kan ram leh hnam damna chu nitin kan hnathawhna thlarau rah kan lan chhuah tirna ah hian a ni. “Aw mihring tha chu a entir tawh che a ni; LALPAN a phut che chu eng nge ni? Dik taka tih leh khawngaihna ngainat leh i Pathian nen a thuhnuairawlh taka len dun a ni lo vem ni?” (Mika, 6:8).

Chhungkua a tlakchham a a awm a sum lak luhin a daih tak loh te hian DIK TAKA tih te hi a va har thin em! Mahse chu chu LALPAN a phut che a ni. Thlaler-a riltama kan Lalpa a awmlai khan Setana khan lungte chhang a chan tir turin a thlem a, pum a rik ruk ruk phei chuan chhang tuihnai tawk a chan tir kha a chakawm ngawt ang. Mahse chu thlemna chu Amah kan entawn theihnan a hneh a ni. Zirlai tan kan mawhphurhna chu enge ni ve ang le? Kan pian kum (DOB) dik tak a ziah te, Scholarship form a fill up tur kan nu leh pa te income diktak kan ziah (DIK TAKA) tih hi min phut a nilo em ni?

Nu leh pa tan sawm a pakhat Pathianin a chanvo a a ruat hmiah te hi DIK TAKA kan pek hi a phutlo em ni?

Kan buai em avang hian nitin hian Pathian nen hian kan leng dun hmanlo em ni le? Kan hnungtawlh tak tak hi chuan kan tawngtaina thluk te hi a zuai raih tawh thin nia! Pulpit tlang a thusawitu te kan nun a sengluh aiin sawiselah kan ram tang duh a. Keimahni leh Pathian inkar ngaihtuah aiin midang leh Pathian inkar tur kan buaipui chiam thin. Kohhran in hmanna a hmantlak viau si chhungkua a tangkai mang silo te hi ringtu tha an nilo! Ringtu tha dik tak chu Sam a lan dan chuan “A ni chu tui luang kianga thingphun, a hun te a rah thin a hnah pawh uai ngailo ang hi a ni a, a thiltih a piang chu a hmuingil zel ang” Mite tan a rah chhuah thin, a thiltih zirna ah pawh pass thin a ni tur a ni. Siamtharna chang leh tur hian Lal Isua Kraws hnuai a thuhnuairawlh taka kan kun leh hi a tul a ni.

Bible-a mi rinawm Josepha chanchin hi a ngaihnawm ngawt mai, Josefa anga rinawm taka nitin a hnathawhna hmang a Pathian chibai buk thin hi Pathianin a zawng mek a ni. Josefa nunah hian khawvel a thil thleng khat kan hmu Jail atangin Prime minister nihna. Potiphar-a nupuiin mutpui tur a thlem chiam khan ti hian a chhang “engtin nge he sual lian tak hi tiin Pathian chungah thil ka tihsual theih ang.” Ni e, kan thiltihsual thin hi mi chungah kan ti sual a nilo a Pathian kan chung a mitlen reng tu hnenah kan ti sual thin a lo ni.

He thumal te “DIK TAKA TIH” tih hi kan ram leh hnam din chhuah nan chuan a tawk.