Thank you for all these gifts

O taste and see that the LORD is good- Psalm 34:8

Ka ngaihtuah let a kumin ka kum thatloh kum a nihzia leh ka eng tih mah reng reng fuh hlei theilo te. Ka lung a awi lo hle mai a, engvang tak ni ang maw? Mahse ka rilru-ah chuan boruak dang daih mai a lo lut ta a, “thil thlawn pek ngun takin chhiarla, nangma chan mai chu mak ti rengin i fak phawt ang a petu.” Chutia in dawm kun renglo chuan malsawmna ka dawn te ka chhiar ve ta thung a. Thla rei tawh tak ka ban tliak leh nerve thalo chuan ngai a lo awh leh tawh a, ka duh duh ka chawiin ka duh duh tihnan ka lo hmang thei reng tawh a. Zirna avanga chhungte kum sawm chuang ka kalsan hnu-ah an bulah chengin ka duh duh hman a duthu kalo sam thin te kha ka ei in ka lo in ta a. Ka result la chhuak lo mahse Aizawl College zing a thawh chakawm ber maiah Pathianin ka thawh ve tur a lo dah ve reng mai a, chutah kum dang pawh an la tih hleihloh thawknghetlo te tan hlawhpun te pawh anlo sawi ri ta zel a. Office thawk te miten biak kan harsat deuh an tih pawh ka lakah chuan an tha viau zel a. Ka thawhpuite ka chhungte ang chiahin ka en a, nitin hnathawka chhuah kan chak em em tlang theuh a, hetiang a work atmosphere thatna hi ka la tawng ngailo. Ka rin phakbakin tun hma ka kalna thin International level workshop te kha Pathian leh thiante zarah liau liau ka lo buatsaih ve ta reng mai. Mumang te pawh a ang rum rum nia.In lama ka chhungte lah lensan hreawm khawpin min thlahlel a, thian tha tak tak te’n ka harsatna ah min tawngtaipui reng bawk a. Ka hmabak kawlpui ber mai thesis harsatna ber ka guide pawhin kei aimahin a rawn hmanhmawh tawh zawk a. Ka hlim chu ka thaw huai mai a ni.

Heng zawng zawng te hi ka phu ve reng em? tih ka in zawt a. Phu miahlo, ka nun hman dan ka ngaihtuah phei chuan “Ava mak em” tih mai tur hlir an ni.Ka tih that lam ka ngaihtuah ve thung a, sawi tur pawh ka hre barlo a. Heng malsawmna zawng zawng te hi amahin a lo awm ngawtlo a Pathian thilthlawn pek a ni chiang mai. Tun Krismas lo awm turah hian malsawmna hnar thil engkim insuihfinna ka tan “Isua” Pathian fapa mal neih chhun min pek hun a ni tih ka han ngaihtuah zel a. Ka lawm em em a ni, ka thinlung takin Pathian hnenah lawmthu ka sawi a. Ka hmabak lungkham buaina zawng zawng hi engkim neitu hnenah chuan ka hlan vek a, a chinfel zawhloh reng reng hi a awm dawn silo a, thlamuanthlak hle mai. “Fapa pekin KA awm ta” chu thilpek dawngsawng tur chuan ka thinlung thehtawpin kalo buatsaih ve ta a ni.