Lawmna a khat

Mihringte kan hlutna ber hi chu lungngai thei, lawm thei kan nih hi niin ka hria. He khawvel kan damchhung hi a reiloh tehreng nen lungngaihna in min tuam vel a, nitin tha zawk beiseiin kan hmanhlel thin. Hmanlai khan chu mihring-a famkimlo chu hrilhfiah thei zawngin Buddha chuan sakhua pakhat a rawn hmuchhuak a chu a zirtirna-ah chuan “khawvel a kan tawrhna zawng zawng hi kan ih leh awh vang a lo ni” tih hi a ni. Hemi hnu hian Economist Adam Smith chuan “hringmi hian duhkhawp reng a neilo” a lo ti bawk. Ni e, duhkhawplohna ramah hian kan awh ber pawh nei ila a dang a lo awm zel mai. Enge lungawina chu nit a le?

Kan naupanlai chuan hla mawi tak pakhat kan sa that that thin “lawmna a khat rilru thianghlim, a mawi tuktin par aiin”. Lawmna a khah hi a lo har ngang mai kei tak hian ka theihloh ber pakhat a ni. Thesis thehlut turin ram lum eltiang an sawi Hyderabad-ah ka chhuk a. Khawlum te, vaiho dawr a min ngaihsak thamanglo te chuan thinrim a ti puntir a, mahni hriat tawk lekin kan phun kan phun mai. Ka thil tih zawhah Vellore lam a kaputea te chhungkua kal thlak ngai awm ka zuk tlawh ve thung a. Chutah! Khawvel a mak ka tih ka hmu ta, lawmna a khat rilru thianghlim chu! Missionary in an kal a, hmanlai tlangval sport thei tak zuan zang tak kha stroke avangin a lo kal bai nasa mai a. Damlo chaklo thisen laksak chhen leh rihna hlauh reng mai an ni a, a hmel a chau tih pawh a hai theihloh. Damdawi inah chuan ka zui ve a, khua pawh a lum an phun ve ngai reng reng lo! Tlai lam chhung inkhawm kan neih chuan “Lawmthu sawina tur” ringawt hi an chhakchhuak a. Chhung inkhawm chu hun an renlo mahni a lawmna an tawn theuh te an sawi hlawm a. Kei a lungawilo thei tak pawh mak tihna in ka khat a a tawpah chuan ka nun a pawimawh em em tur pakhat ka ngaihtuah chhuak ta.

Thinlungin thil engpawh a pawm hi chuan harsatna tawrh a awlsam a, a nih loh chuan harsatna hian a zui mai thin tih hi. Khawlum te pawh thinlung hian a pawm tlat chuan taksa lam chuan a lo tuar thei mai a. Inngaihzawn chungchangah te thinlung in a pawm zan loh chuan harsatna neuh neuhin a zawm duh, thinlung a pawm chuan ngaihdamna pawh a lo sang mai thin. Chu thinlung a pawm theihna chu neih ngawt theih a nilo a, harsatna kar a lo lawm viau pawh chu mi a nihna te pawh a ang lek lek thei bawk. Mahse khawvelin a pek theihloh chu harsatna zawng zawng phurzo tu Lal Isua hian a lo pe thei reng mai. Chu thinlung atang chauh chuan lawmna in a khah theih.