Empire State of Mind!

He hla hi MTV MVA 2010 nge ka hre ta lo an rawn sa a, a nalh kan ti tlang hle. New York khawpui fakna a nih avangin New York a awm tan chuan sak nuam tak tur a ni. Hemi tluk tho hian Vincy-a pawn “Aizawl” tih a rap ve tho a, a thuril dan han khaikhin hi ka tum a nilo a, “empire state of mind” lai a zawk hi ka thlirna atanga tehin rawn sawifiah ka tum zawk a ni! Zofate hi Israelfate ang deuh hian kan ram ngaih hi kan tin a fu, miramah erawh chuan an ni anglo takin kan ram hla te uar takin kan sa lawi a.

Chu mahni ram bial chhung atang ringawt a khawvel tehna chu ka hrilhfiahna dan a “empire state of mind” chu a ni. Chu kan ram ropui bak chu rilru hian a a ban phalo a, kan changkanna te, kan lehkhathiamna te, kan zaithiamna zawng zawng te chu khawvelah chuan a tham ral zo a, “he lui kam atang hian enge awm?” tih kan ngaihtuah zui peih vaklo. Chu inkhungbing duhna chuan thliarkar rilru min pe a, “Mizo kan ni kan hmel a tha, kan tum a sang bawk si” ti thin mah ila kan tum ram hian chu khawpui bak chu a pel meuhlo! Global khawvel kan ti a, technology in min run hrep hnu-ah pawh kan kut leh thut hmun atang bakin khawvel hmun dang a thil awm chu kan ngaihven peih meuhlo.

Ni e, chu khawpui-ah chuan engang pawn a khawlai vaivut te chu khu mahse kan ngaina tlat, ruah leh tuihawkin min nuai chiam mahse kan thinlung a hlim tlat. Chu hmun chu kan tan chuan “Jerusalem” a ni a, khawizu leh hnute luanna ram a ni. Mahse heta tang ringawt atanga khawvel the ringawt zawng a felhlel ta deuh in kaiharh teh ang. Sorkar hna ringawt hian hetiang zozai thalai te tan hian hna a rawn satchhuak zo dawn reng reng lo. Kan politician mahni dawhkan bak hmu phalo atanga beiseina neih pawh awmzia a nei bawklo. Chhiartu duhtak, khawvel hi han thlirchiang teh chona lian takin a hmachhawn che a ni. I ke i penchhuah rual hian Mizo leh Kristian i nihna ang a mawhphurhna chuan a hmuak che a ni. Ringtu nihna hi khawvel entu nihna a ni, helai thliarkara mahni hlimna tawka rawngbawlna mai a nilo e. “Empire larger state of mind” puin khawvel ngam rawh.