Friday, April 30, 2010

Ka ngaihtuahnawn fo thin "The Old Man and The Sea"


Pawl sawmpahnih kan zirlai ni ta in ka hria Gov't Higher Secondary kan kal lai hian "The Old Man and the Sea" tih hi kan Miss thiam tak khan min zirtir thin. Hun tam a liam hnu University of Hyderabad-a Master kan zir hnu-ah ka roommate Bengalee pa Rajasthan zin haw chuan he lehkhabu pan te bawk hi min rawn hawn a. Nikhat chu tih tur a awmloh em avangin ka chhiar leh ta a ni.

A ziaktupa Ernest Hemingway lah American writer zing a roipuiber pakhat a ziah zerang kalpui dan thin "iceberg theory" larpui tu a ni bawk a. A thuziah tlartin mai chuan awmzia a nei em em vek mai. Ka duhlai pahnih:

"The sail was patched with flour sacks and, furled, it looked like the flag of permanent defeat." Mizo hla pakhat "A chau a ni ka Lal" tih hla te kha rilru-ah a rawn lang uaih uaih a. Putar paa han ziahdan te hi- "Everything about him was old except his eyes and they were the same colour as the sea and were cheerful and undefeated."

Ni e, he khawvel tuipui zautak-ah hian mitin te'n thil thazawk hun thazawk beiseiin sangha man kan tum theuh a. Atirah hlawhchhamna hian mi thenkhat chu a awpbet thuai a. Mahse putar pa chu hlawhchham thin mahse a beidawng hauhlo! Sangha man na tur a a hmanraw neih te chaurau hle mahse a bei fan fan a. Nisa lutuk te, thangrei luat avanga ril tamna te chu a tuar hram hram a. Achang chuan amah leh amah a inkawm hlim a ngai bawk a,theihtawp a beihna chuan rah tha a chhuah ta.

Sangha lianpui mai Marlin chu a man ta hlauh mai a, he sangha hi a len em avangin a that lawk theilo a, a hnuk kawi a hnuk kawi mai a ni. A tawpah chuan a that ta a. In lam pan a a kal lai chuan Sangha thisen chhuak chuan Shark a lo ko a, sangha a thahsa rawn eitum shark panga lai a that leh a.Shark dang te chuan a man lai ngei pawh chu an eizawhsak lo chauh a a ruhrel chiah an dahsak a ni. A tawpah phei chuan a chau tawngkhawng chu a muhil ta hial a...

5 comments:

Anonymous said...

tha dup2 thin hle mai..boss nge nge

Malsawmi Jacob said...

Old Man and the Sea hi chu kei poh ka duh, a poetic riau alom.

Varte said...

lung i va'n ti leng ve, kan zir thin ngei kha, he putar hi ka khawngaih thei ania aw,...

Te-a said...

I blog hi thlir a nuam

sawmpuia said...

@anon: I ti lawmawm dup2 e.
@mesjay: Nia i chhiar ve thin ngei ang chu vawi tam :-)
@Varte: Keini pawh kanlo hahtawp thin a lawm :-)
@Te-a colney: I ti lawmawm e..i blog pawh thlir a nuam...


Kan internet a chhe reng a...ka rawn dikdak theilo a ni e...