India ramah chuan pathian ang a an biak Bawng hi a lalber mai awm e, traffic Jam khawpin kawng kan mahse a speed pangngaiin kawng a zawh ngut ngut thin. Fiamthu thiam Russel Peters chuan Kolkata kawthlera Bawng champ taka kal hmang hian mipui sang tam a ti nui tawh a. Hyderabad lehkha kan zirlai a kan haw Howrah Train stationah sawn vai hi tam kan ti thei hle mai a, kan thianpa chuan nui sun sun pahin “vai nih an va tlin tak” a tih lai pawh kala hrechhuak e. Chu hmun ngei, mipa tam takte’n an tlukloh DiDi rorelna-ah chuan hnathawh avangin ka awm a lo ngai ve ta!
British India sorkar-in Partition of Bengal Annulment an puan hma zawng khan India khawpui ber chu “Calcutta” hi a ni thin. British ho in India ram an chhuahsan hnufe khan India ram hmun hrang hranga mithiamte’n colonial influence duhtawhloh avangin sap phuah khawpui hming an thlak sup sup a, hetah hian he khawpui pawh hi a awl biklo, kum 2001 khan “Kolkata” ti a thlak a ni ve ta a ni.
Gunter Grass lehkhabu “Show your tongue”ah khan Kolkata khawpui chu a thim zawngin a ziak a. Kolkata chu Bengali tawng Kalikatta (Kali pathian) atanga lak a nih thu min hrilh a. Lei chhuah hian Bengali culture-ah chuan zahna (shame) a entir a. Nun zahthlak tak mai Kolkata khawpui a mihausa leh miretheite inkar zau thuk lutuk chanchin chuan a lehkhabu hi a luah khat a. In bang tam taka bawngek kai thler thlurte, electric awm mang lohnate, hmeichhia tam takin factory hnathawk a hlawh tlemte an dawng chauhte chu a sawi chhuak a ni. He a thuziah hian Politician leh mithiam thenkhatte lung a ti awilo hle nghe nghe a ni. Gunter Grass lehkhabu chhiar hnu hian “City of Joy” kanla ti thei dawn em ni tih hi ka zawhna ani fo thin.
A khawpui hming put chhan ber dang pakhat “City of Joy” pawh hi kum 1985 novel Dominique Lapierre ziah atanga lak kha a ni a, kum 1992 khan Roland Joffé hian film hmuhnawm takah a siam a ni. He movie-ah hian rickshaw puller pakhatin nun tha zawk beisei a Kolkata a rawn luh thu a ni a. A awmna slum chu “Anand Nagar” hlimna khawpui an tih a ni a, he hmun tho-ah hian sap pahnih chuan miretheite tanpuiin hun an hmang ve bawk a ni. Hlimna hi sum leh pai zawnga i teh a nih chuan he movie-ah hian hlimna pakhat mah i hmu lo ang. Theih ang tawk a an thawh hlawh hlim taka an hmangho leh mite tan an thawh chuan an awmna chu “City of Joy” ah a siam mai a ni. Thenkhat chuan Mother Teresa leh Missionary of Charity te hnathawh behchhan a siam a ni an ti bawk. Mother Teresa thih khan khawvel mipuiten Kolkata khawpui-ah mit a fu thuap mai a. Mirethei chanhaite tana nunna leihbawtu chu zah a phu a ni. Hei hian thil tam tak min ngaihtuah tir a, mihring hian enge hlimna kan tih? Chu chhanna chu - Kan telve na, ngaihtuahna kan senna-ah hian kan ngampa a, nuam kanlo ti mai thin. Mizo uihum zah vel chauh he khawpuiah hian kan awm a. Mizo kan nihna anga khawtlang hriata kan awm ve hi a ngai a ni. Chhiatber lo thlengse kan tihbuai tur chu kan hnampui Mizote tho hi a ni. Tel ve ila, neitu nihna chang ve ila nuam kan ti ngei ang. Mizo tlawmngai tak takte, inkhawmna leh Fellowshipna tur tha a awm avang hian a lawm “City of Joy” a lo nihna chhan chu.
Picture credit: tusharkmandal
1 comment:
A ngaihnawm in a bengvar thlak hle mai
Post a Comment