Sunday, April 15, 2018

Pi Nuchhungi Chanchin atanga thu tlem


Kan naupan lai khan “Titi ik ik” hla hi kan chham nasa \hin hle a, a phuahtu Pi Nuchhungi hla hi kan chhung zinga ni ve awm hrimin kan lam ngun \hin hle. Hla thu mawlmang tak a lang, fing tak si alo ni. Kha hla chham zawh khan kapa hian Lalipop thiam vanga min dawn tir \hin a chumi vang pawh chu a nimahna “ti ti ik ik” hlate hi chu a hunahte a hunlo-ahte kan chham mawlh mawlh mai a ni.

Tun khaw hnu hian a chanchin chu tihtakzetin ka belchiang ve ta chauh a. A chanchin hian belhchian a lo dawl hle mai. Ka chhiar lai hian achang chuan hlim takin min siam a, retheihna nun kawng bumboh tak ka chhiar lai chuan minti lungchhe deuh bawk a, a taimak leh tumruhzia ka chhiar laiin ka rilru-in keimah leh keimah ka infuih mawlh mawlh bawk \hin. Pathian a rinzia leh a tuarchhel ziate, hun a vawn dik ziate ka hmuhin tunlai \halaite tan moral exampler \hatak a nih hi ka ti leh a. Chutiang a ngaihtuahna chi hrang hrang min neih tirtu chu Pi Nuchhungi hi a ni.

Historian mita thlir tur ka nih avangin ka chhiar te chu ngun takin \an lam neilo “objective” taka thlir ka tum ta a ni. He a chanchin leh a thuziak a\angte hian history a thil thleng satliah nilo in history thlak danglam tu “Agent of change” angin ka hmu ta a ni.

Educational Realm(Zirna Khawvel):
Khawthlang lam sap ho ngaihdanah chuan ziak a dah\hat nei lo hnam chu History mumal neilo (history less) in an ngai hmiah mai a. Sap lo kal hmasa te pawh khan an bitum hmasak ber pawh Ziahna tur hmanrua ‘Alphabet’ ngaihtuah a ni. JH Lorrain (Pu Buanga) leh FW Savidge(Sap Upa) te’n Hunterian system behchhanin Roman script hmangin A AW B minlo siam sak ta a. Thu Thungthar- Chanchin |ha Luka, Johana, Tirhkohte hi alphabet an siam hmang chuan Mizo |awngin an let chho \an ta a ni. Kum 1895 khan Assam Sorkar hnuaiah Child’s Premier tih chu Mizo |awngin an chhuah ta nghe nghe a. Heng bakah hian sap hla \hahnem tak Mizo |awnga leh a ni bawk. Amaherawhchu kut an thlak tam hma hian Arthington Mission chuan Chanchin \ha la hrelote hnena hril zel an duh avangin an hnuaia thawk missionary pahnih hi hmun dang a thawk tur a koh let an nita a. Zirna chungchangah hian Sorkarin nasa takin hma a la ve a, zirna medium pawh Bengali tura duan a ni nghe nghe a. Chutih lai chuan Mission School \henkhatte a awm ve bawk a. Sorkar chuan Mission School naupangte chu sorkar School aia an tih \hat zawk \hin avangin Zirna zawng zawng a mawhphurhna pawh missionaryte kutah a lo hlan ta a ni. A tawi zawngin sawi ta ila Zosap Missionaryte khan zirna kha an ngaipawimawh em em a, chumi zingah chuan Pi Zirtiri kha zirna ngaipawimawh tu a ni. Amah hi Pi Nuchhungi engkima kaihruaitu a ni nghe nghe a ni. Zosap Mizo |awnga ziak hmasate hian an ngaihpawimawh chu Mizote Kristiana an lehna tur hmanrua Chanchin \ha leh hlate translate a ni ber a. Pi Nuchhungi erawh chuan Kan Mizo Thawnthu leh Mizo naupang Infiamna te ziaka dah \hat mai bakah zirtheiha min chhawp chhuah sak hi a danglamna a nita a nih chu. Hei hi thlirna pakhat Post Colonial literature a\anga thlir pawh hian a sang hle a. MIthiamte chuan saprim nam kher lo mahni hnam zerang auchhuahpuina hi an ngaipawimawh em em a ni. Hemi avang ringawt pawh hian ziah written literature kan neihna ruangam thlaktu kan ti thei ta awm e.

Reading the author (Ziaktu nihna bihchianna):
Pi Nuchhungi hi Mizo History-ah hian pawimawhna tam tak a nei a. Mithiamte’n “history i chhiar tak tak hma in a ziaktu (historiante) chanchin bihchiang hmasa rawh” an lo tih \hin ang khan a thilziah chhuahte (Contextualize) hrethiam tur chuan a chanchin hi bihchian hmasak a lo \ul ta a ni. Chu hriatthiamna chuan a thuziakin a tum ram leh a phena thu inphumte min hriat tir thei dawn a lo ni. Heng mai bakah hian mithiam EH Carr chuan “What is history?” Enge ni history chu tih a ziahah chuan history a thil lo thlen chhan chihnih a sawi a chungte chu- Determinism (Ruat lawksa) leh Free will (duhthlanna) vanga lo awmte chu a ni. Pi Nuchhungi thilziah tam tak hi Aman a duhthlanna vanga a ziah emaw, engemaw mawlh tu chhan awm hmasa tawh avanga ziahte a awm em tih a chanchin a\ang hian a lo lang chiang dawn bawk a ni.

Pi Nuchhungi hun lai (Nuchhungi Era) hian history-a thil thleng pawimawh tak tak a awm a, Indopui pakhat lai a Mizote’n Feren ram kan kal lai hnu deuh te, leh zirna in Mizote khawvel thlirna a tihdanglam lai hun a ni a. A tawi zawngin Mizote Khawvel thlirna inthlak hunlai a ni a. Chutah chuan amah ngei pawh hi history a tel ve satliah nilo in thlak danglam tirtu a ni hial a ni. Chuvang chuan he paper ah pawh hian ‘She’ hi sawifiah turin ka rin bial ta kalh a. A awm zia chu Pi Nuchhungi, hmeichhia pakhat hian Mizo zinga hmeithai, fahrah, zirna khawvel sawifiah a tarlangtu/ai a awh ta angin ka hmang ta a nih chu.

Hmanlai Sapho lo kal hma kha chuan ringtu hmasa leh hmeithai, fahrah chan a chhiat zia chu thawnthu hrang hrang leh thu kan inhlan chhawn (Oral Tradition) a\angin kan hmu nasa hle a. An khua Ralvawng a\anga Chengpuia an pem dan leh Serkawna an insawn nachhan pawh hi tihduhdahna tuar nin vang leh \anpuitu sap belh a remchan vang a ni. Pi Lalthanglovi (Pi Nuchhungi nu) hian chu Mizote Khawvel thlirna thlak danglam tur chuan a fanu Pi Nuchhungi hi school a kal tir a ni tih a hrethiam pha kher awm lo e.


Hmeichhe \ha chherchhuah (Creation of ‘Ideal Woman’):
Zirna hrim hrim kha lonei a eizawng Mizote tan chuan thil \angkailo taka ngaih a ni a, chumai nilo in inchhung sekrek khawih a mawngvawmba ang mai a hnathawk \hin hmeichhe tan phei chuan thil \ul lo leh zual a ni. |henkhat sawi danah phei chuan, “Lehkhazir lo ang a \ul lo, bialpa te lehkhathawnnan in hmang mai mai” ti te chu an sawi duh dan a ni. Pi Zirtiri pawh hian a School a lut tur hian thingtlangah a zin nasa hle a, a hmuh chhunte chu mihrisel lo leh hmeithai fate an ni tlangpui \hin a ni. Pi Lalthanglovi (Pi Nuchhungi nu) pawh hian Pi Zirtiri sawmna avang hian a fanute pahnih (Lianchani leh Nuchhungi) chu Serkawn Schoolah hian a dah ve ta a. He school hian chona lian tak an nei a, lehkhathiam Mizo hmeichhiate chu pasal tlak an nih zia lantir a ni. Nupui tlak (Victorian model of ideal woman) kan tih ang hi khawthlang sapte pawhin an lo thupui ve \hin a ni a. Mipa tana nupui tlak ni turin thiamna leh tinrengah hmeichhiate an sawizawi (train) \hin a ni. Chutiang hnuai tho a inzir chhuak Pi Zirtiri chuan a school a lo lute chu nupui tlak ni turin chhuah ngei ngei a tum a ni. Hemi tur hian Mizo in \ul kan tih zawng zawng, belvuak, buhthlei, inchhung sekrek khawih etc chu thiam vek a ngai a ni. Discipline khauh tak hnuaia enkawl an ni bawk a, \henkhat chuan thununna hnuaia awm chu an tlinlo a kal ziktluak lo te pawh an awm hial a ni. Pi Nuchhungi erawh hi chu thuawih thei tak leh anu a\anga mi taima an nih avangin hreawm tih chang nei mahse zirtirtute mit tlungin a thawk \hin a ni.

An tum chu an hlawhtling thuai a, Mizo hmeichhiate pasal tlak an nih zia chu Pi Nuchhungite zirpui a\ang khan chiang takin tarlan a awm ta a ni. Chu thil finfiah a nih hnu chuan Mizo nu leh pate tam tak pawhin an fanute zirna schoolah chuan an lo dah ve ta nghe nghe a ni. Hei hian hmeichhiate zirna leh thiamna lamah tam takin kawng a satkua a, vawiin thleng a Mizo hmeichhiate hlawhtlinna bul hi ngun taka chhui chuan he schoolin a rahchhuah hi kan ti lo thei lo a ni. India ram zirna harhna kan tih mai Indian Renaissance lai pawh khan Ishwar Chandra Vidyasagar te chuan hmeichhiate dinhmun kan nan hian hmeichhia school an din nasa hle a ni. Hmeichhiate tan social upliftment kan tih mai khawtlanga an dinhmun chawikanna pawh hi zirna nen hian a inhnek tlat avangin Pi Nuchhungi hi social reformer ropui tak a ni. Chumai bakah kum 1938-a hmeichhiate atana Kohhrana rawngbawl ve theihna tur pawl din Girls Auziliary (GA) ah khan Tresurer hmasa ber a ni a. Kum 1965 he pawl Baptist Kohhran Hmeichhe Pawl a lo nih hnu pawh khan kum sawm chhung President hna hi a thawk nghe nghe a ni, Rambuai vanglai 1966 lai pawh khan huaisen takin he pawl hi a kaihhruai thu kan hmu bawk. Heng bakah hian a hnathawhte avang hian Kristianna chuan ram nasa takin a la kan ti thei bawk a ni.

Inspiration (Ziak tir tu):
A thuziah tam tak hi Pi Zirtirin a nawrna avanga ziahte a ni hlawm a, paper hmasa a kan ngaihthlak tawhang khan awmze nei tak leh belhchian dawl tak te a ni hlawm. Thingtlang bati awm mumal lohna-ah zirtir hna thawkin chhunah nilengin thawk mahse taima takin Mizote tana thil \angkai chu a lo ziak chhuak \hin a. He a thuziahte hi ngun taka belhchian chuan a hmalam a lo ziah tawhte anglo takin Mizo naupangte a dah hmasaber a. Hei hi chhungkaw \ha din nan leh hmathlirna thui tak nei tan phei chuan thil hlu tak a ni. He a thuziahah hian Mizo hnam a bikin thingtlangnun hi suangtuah theih tur chhiartute min siam a. “Ti Ti ik” tih ngawt pawh hi Mizote’n sana neilo a hunbi kan chhiar dan thlengin chiang takin a hmuh theih a. Uinote mawi te phei hi chu rinawmna zirtirna a lang daih thung a, Mizo lo neih dan leh ram humhalh a \ulzia pawh a thu leh hle ah hian tam tak kan hmu thei bawk a ni. Heng bakah hian thildang tam tak sawi tur pawh a awm \euh mai. Mizo culture inthlak mek a chu kan hnam moral values, thiamna leh finna te kha ziaka chhinchhiahin min lo dah \hat sak a ni. Mizo History thai hmasa Rev Liangkhaia khan Mizo history a ziah nachhan ti hian a sawi a, 1) Mizo te chanchin chu ziak a dahloh chuan a hriate an tham ral zel anga nakinah a boral mai ang 2) chubakah khawvel hriat tur a Mizote chanchin ziah chu a ziah chhan niin a lo sawi tawh a. Pi Nuchhungi pawh hian a ziah chhan hi sawi lem lo mahse Mizote tan rohlu thamral mai tur chu \hangtharte tan a lo hnutchhiah a ni.

Mahni inhriat chianna (Realisation of Self for nationalism):
Sapho in India ram a Western education an rawn \an tirh khan sorkar chuan sum tam tak zirna tan a chhawp chhuak a chuta an inhnialna chu Vernacular mahni \awnga zirtirna kalpui leh English-a zirna kalpui chu a ni. English a zirna chu kalpui a ni ta a, hei hi duhlo in India ram zalenna sualpawl Congress-a bikin kalfir pawl Extremist kan tih te khan India mite thinlunga India mi nih ropuina tuh an duh avangin he vernacular education hi nasatakin an chawi lar a, nationalist school, college te hial India ramah an lo din sup sup mai a ni. Pi Nuchhungin min hnutchhiah Mizo culture fir tak mai hi keimahni Duhlian \awng ngeiin min dah sak a. Mizo a ngaihsan tur dik leh chawisan tur dik min kawh hmuh a, a thu kan chhiar hian Mizo nih chu a nuam ta em em mai a ni.

Incheina thlak danglamtu pakhat (Change in Dress):
Pi Nuchhungite kalna school chhuakte hian uniform mawi tak an nei a. Hetih hunlai hi Mizote incheina kan inthlak danglam lai a ni a. Lu meh kan chin \an lai leh incheina-a zahawm kan tih sapte inthuamna kan chin \an mek lai a ni. He schoolah pawh hian anmahni dehchhuah ngei thawmhnaw chu inbelin incheina zahawm tak chu kalpui a ni. Chu chu mite’n an hmuh khan an khawvel thlirna piah lamah incheina thlengin midangte tan role model an lo ni chho ta nghe nghe bawk a ni.

History repeats itself:
A pasal tur pawh hi Pi Zirtiri te duh anga hmun hrang hranga rawngbawlpui a awm sawn pui thei tur a nih avangin a rawngbawlna \awmpui thei tur Pu Rualkhuma a nei ta ngei a. History repeats itself an tih angin Missionaryte hrin Kohhran hruaitute he ngaihtuahna \awmpuitu pawhin Baptist pastora nupui turte sorkar hnathawklo an duh kher nachhan hi tun hma lama thil thlengte kha a lo lang chhuak leh mai niin a hriat. Hetiang hi thil thleng thei a  nih avang hian tunlai kan khawvel hrethiam tur pawh hian ngun taka kan history kan keu let pawh a \ul hle a ni.

Mizote Khawvel thlirna ti danglamtu (Changing the Mizo worldview):
            Pi Nuchhungi hian Thingtlang mite tan zirna hmasawn turin nasatakin hna a thawk a, Thingtlang khaw hrang hrang Darzo, Cheural, Lungdai-ah te Boardingah te a thawk kual a ni. Mitin tan chanchin |ha tih baka mitin tana zirna (Education for the mass) hi atakin a nunpui a, a posting reng reng hi a sawisel ve ngailo. Amah hi thingtlang chhuak a nih angin thingtlang mite tan leh Mizo hnamte tan a thawh hi a hreh lo hle tih a hnathawh a\ang hian kan hmu thei awm e. Mizote a bikin hmanlai puithuna ang chite an rilru a an lo hlauhte thlak danglam tur hian amah leh school naupangte hian thil nasatak an ti nghe nghe a. School hmun a ramhuai awmna ni a an ngaih an thlan kher nachhan hian a ti chiang awm e. Hei hian literature khawvel ringawt nilo in kan rilru leh khawvel thlirdan nasa takin min thlak danglam tir a ni.

Music Industry lamah (Field of Mizo Music Industry):
Amahah hian thil pawimawh tak tak Mizote’n a kan chhinchhiah tur a awm nual a. Thingtlang an rawngbawlna Pi Zirtiri hian a zai tir mai \hin avangin Mizo Gospel Solo lama sulsutu a ni bawk. Mizo Music industryte pawh hian an duh a nih chuan a hla sak zerang paih lamah Solo hrim hrim a lo \han chhoh dan leh nghawng a neihte Mizo kristian Culture zirnan amah hi hman tlak a ni bawk.

Hnam lam chhui zui tur ( Research to Mizo traditional dance):
Mizote’n kan hman lam zinga mawi kan tih leh kan roh ber Cheraw lam hi a ze bul leh a \hanchhoh dan zir duh pawhin a chanchin hi keu uluk a ngai hle. Cheurala a thawh lai khan a thawhna hmuna Lai hnamte chuan rawkathla an tih mai hi an kan \hin a. Chu chu a hmuhin a naupangte a zirtir ve mai a. He lam hi raicheh an awm a an kan \hin a ni a. Khua a mite chuan an lo la thu tak em em a, an kam khat hial a ni. Hnam lam hi lam satliah a nilo a, Culture thuk tak a inphum a, a lam dan che zia tinreng pawh hi Mizo hnam zia tarlanna vek a lo ni. Serkawn a let hnu-ah a lam dan step te a ti \ha zel a “Cheural lam” tiin a vuah a. He lam Cheraw kan tih tak hi Lusei ho zinga \ai darh tu pawh a nimahna le. Mizo cultural history zirchiang duh tan chuan he lam ringawt pawh hi zir tham a lo ni. Pi Nuchhungi contribution hi he zirna huang chhungah hian a dik emaw diklo emaw ngun taka chhui zui tlak a ni e.

Sawi tur tam tak a awm a, hun a tlem deuh avangin tuna kan sawi mai tak a\angte pawh khan Mizo hmeichhia zinga mibik a nihzia a lang chiang hle a. A kutchhuak leh a nunah hian university in a degree an pek san theih ber doctorate hial hlawhna hi a in phum \euhin ka hria. Pi Nuchhungi, Mizote tan kan thinlungah dam reng rawh se.

2 comments:

Unknown said...
This comment has been removed by a blog administrator.
Unknown said...

Pi Nuchhungi kutchhuakte hi thailan a va tha ve.