Wednesday, January 26, 2011

Reading Kierkegaard

Khawvelah a damchhung ni reilo mahse hnutchhiah thatak neiin min kalsan a. A dam chhung kum 42 khan lehkhabu 25 zet a ziak hman a. Kumzabi sawmhnihna ah chuan a hnathawh te'n Europe zirna bu zawl a chhem nghing a philosophy ropui tak mai " Existentialism" tih a rawn tichhuak ta a ni.

A thuziah chu "Ama chanchin, apa chanchin, a bialnu chanchin" chauh ni mahse a chhiartute'n ngunthluk taka an bih hnuin anmahni chanchin ang tho ziahna a lo ni reng tih an hmuchhuak a. Hringnun bung leh chang ngun tak a hrut avangin hei hian a thuziak a ti hlu zual a ni.

Chhungkua buaithlak : Apa Michael Pedersen Kierkegaard hi Denmark khaw te reuh te ah chhungkaw rethei tak atangin a rawn chawrchhuak a. A naupanlai hian beram a veng thin a, a dinhmun khirh tak chu ngaihtuahin tumkhat chu Van Pathian anchhia a han lawh ta ngawt a, chu chu an kohhran thurin Lutheran Pietism ah chuan thil serious tak a ni. Tichuan, la naupang tak nimahse an khua atang chuan Copenhagen-ah a sum neih tlem te nen hun tha zawk thil tha zawk beiseiin a pem lut ta a. A sum khawl tlem te chu theih tawpin a tipung chho ta a ni. Soren Kierkegaard hi Copenhagen-ah hian a piang ve ta nghe nghe a, unau pasarih zing a a naupang ber a ni. Anu dam loh natna khum a a awm laiin apa chuan an awmpuinu a lo awmpui ru thin a, chuta tang a amah pawh hi piang a ni. Apa inla sakhaw mi tak si nun a zir hleithei biksilo chu a rilru a hah thin hle a. Pathian anchhia a lo lawh tawhna chuan a nun a rawn run ngeiin a hre bawk a ni. A thil tihsual te tlen faina a ngaiin a rilru inthiamnan a fapa pawh chu Pathian hnenah hlan a rilruk ta a. Abrahama'n Isaka Moria tlang a a hlan ang khan chunglam hnenah chuan a hlan ve ta a ni. He ngaihdan hian Kierkegaard ngaihtuahna leh a hnu zel a a thilziah te pawh a rawn nghawng chho nasa hle a. Sakhuana maichamah chuan a nun pangngai chu hlan a ni a, chu chuan mi pangngai ang a awmlo in chhungkaw nun te, nupui neih te leh a career te thlengin a nghawng chho ta a ni.

Zirtirna dangdai: Afapa chu a thluak a tha tih a hriat avangin Michael hian Soren Kierkegaard hi a theihtawpin lehkha a zirtir thin a. Mihausa ho chawhlui kilnaah te a fapa chu a tel tir thin a, an han haw hian mi hrang hrang te thusawi theuh kha a zawt leh vek thin. Kierkegaard chuan an thusawi theuh te a sawichhawng leh thin. Room-ah te hian ram dang angin a han sawi vel thin a, Paris ni ta se "Khi chu Eiffel tower" tiin a kawk kual vel thin. Puitling taka enkawl a nih vang chuan naupang rilru puitlingin a thang chho a ni. Zirna lamah pathumna ni turin a pa chuan a chah thin a, thiam tan chuan pakhatna nih a harlo a, pathumna chuan pahnihna leh palina rilru awm tur zir a ngai a; an pahnihin kar a awm tur chuan a thiam a ziah chhuah a ngai a ni, an in zirtir dan a dangdai khawp mai.



Hmangaihna kawng chhuk chho! Kum 21 a tlin chuan ngaihzawng Regina Olsen a nei a, kum thum ngawt chhung he nu enthlithlai nan hian a hmang a. A duh zawng engkim a hriatsak a, a ngaihzawng bialpa Fritz Schlegel pawh chu a thianah a siam a. A zawng zawng a hriat hnu-ah chuan upa zawk a ni bawk a, hmeichhia zawk pawn a nep zo bik talo. A thilziah pakhat "Diary of a seducer" hetiang chungchang deuh hi a ziak nghe nghe mipakhatin hmeichhe pakhat a hriatchian em em a hnehchhuh dan. Tichuan, an in hual vat a innei turin engkim an buatsaih chuk chuk a. Mi maktak mai a ni a, "God Had vetoed the marriage" tiin a thiannu kalsan a tum ta mai a. A thiannu pa pawn zah pawh dawnlo in Kierkegaard hnenah a ngen chiam a, mahse lungtum biak ang chauh a ni a.

Denmark atangin Berlin-ah a kal a Professor Schelling hnuaiah Hegelian philosophy a zir ta a, a zirpui te pawh hi an hraw hlawm khawp mai Friedrich engels te, Michael Bukunin te an ni hlawm. Lehkha pawh chu a zir tha hlei theilo, a nupui nimai tur a kalsan tak Regina a ngaihtuahna chuan engmah a tih tir theilo a. Copenhagenah a let leh a mahse a tlai zo ta. Regina chu a bialpa hlui nen Biak Inah an lo in nei dawn ta reng mai a. A mangang chuan Berlin-ah a chho leh a. Lehkhabu a ziah zing a ropui ber mai "Far and trembling" tih chu a ziak ta a ni. "25 minutes too late" te kha lo awm se chuan inhnem nan pawh a hmang ve mahna le! He lehkhabuah hian Abrahama chan kha a in chan a, Abrahama ang mai a thil tisual ni in a kalsan avangin Regina chuan Pathian demlo a amah a dem a duh thu a ziak a ni. Regina chuan Danish Virgin Island a governor a bialpa hlui Schlegel kha a nei a, nun nuam ang takin lang mahse. Schlegel thih hnu khan Kierkegaard a ngaihzia a sawi chhuak nghe nghe. Apa in a lo zitir thinna te leh a hmangaihna kawng bumboh tak chuan a nunphung chu a ziak chhuak ta a, philosophy ropui tak a rawn ziak chhuak ta der a ni.

Thilziah dangdai: Kierkegaard hian a thuziah reng rengah hian midangte ang a "a chhung thuziah sual a awm chuan "keima" mawhphurhna liau liau a ni e," tih ang chi a style a ni velo a. Ani chuan a chhiartu te kha kha thuziahah khan mawhphurtu-ah a ruat thung. A thuziah man tumin an chhiar an chhiar a, a tawpah chuan anmahni chanchin tho ziahna a nih avangin, a ziaktu niloin anmahni an rawn in man chhuak ta a!

Tuesday, January 25, 2011

Dream pillow!

Kan zirtirtunu haw dawn khan ngaihruihna min pe nual a chuta zing a mi chu "Native American dream pillow" hi a ni. Thil chi hrang hrang (Lavender flowers, mugwort, rose petals, white sage, hops, yerba santa, lilac flowers, balsam fir and bear root) te chawhpawlh a ni a. Luhkham hnuai emaw a dah mai tur a ni. Kha thil rim kha hnarah a rawn lut veng veng a. Mumang thatna tur a tih a ni, ka dah tak hnu hian mumang ka nei nasa mawlh mawlh viau mai. Awih lo hle mah ila nun chu a ti nuam ve riau. Amaherawhchu ka hmuh duh tak tak te hmu thin mah ila a commonlo thei khawp, ka han harh a nuichhuah leh thut chang te pawh ka nei bawk thin.

Friday, January 21, 2011

All the greeny thing


Model-Keimah
Background- Reiek

Ram hringdup te hi a hmunah chuan kal ila beisei ang em em a hmun nuam a ni chuanglo a. Thosi leh vangvat tualchaina leh hmunhnawng cherhchurh te pawh a ni ve tho thin. Ralkhat atanga a lan ang ngawt hi a lo nilo fo. Chutiang tho chuan mihring fel hmel deuh te pawh hi han belhchian chuan chawlhna tlak loh leh an bul a awm nuamlo tak a ni duh ve tho bawk a. Thenkhat erawhchu hlataka atanga an lan nawm hmel ang tho in an bulah pawh awm a nuam fo thin.

Sunday, January 16, 2011

Sri Krishna Committee Report

United Andhra/ Andhra Pradesh (Region pathum inzawm Andhra/Rayalseema/Telangana) atanga Telangana state sahthlak duhna chuan Indian politics a tuam lum hle mai. Hemi chungchangah hian Union minister Chitambarama'n thu lo sawi tawh mahse Chief Justice hlui BN Srikrishna Committee hnuaia ennawn turin ni 3 February, 2010 khan an kutah dah a ni a. Report kimchang hi December ni 30, 2010 peih tur ni in mipui hnenah chuan Jan 10, 2011 a puan tur a ruahman a ni. Tichuan, chu committee chuan ngun takin a zirchhuak in phek 461 meuha chhah an ti chhuak ta a. Lo rin lawk ang tho in United Andhra a rawn thlawp a, state sahthlak tum tu te lung a hnur a, a boruak sosanna ber Osmania University-ah chuan Police leh zirlai te an inbakkaih nasa leh hle mai.

Political party te zingah KCR chuan awmze neilo in he report hi a sawi a. Telegu film star politics a zuanglut ta Chiranjeevi pawl te chuan he hun hi an party (Praja Rayam) tan a hlawkna beiseiin an thlawp thu an puanga. BJP lamah pawl ngaihdan a phir! Telangana region-a Congress legislator te'n Delhi an hotute zahzoloin state sahthlak a nih loh chuan ban an tum thu an lo sawi bawk a, state politics a buai in a buai nuaih nuaih ta mai. Hetih lai vek hian CM hlui fapa Jagan Mohan Reddy Congress party atanga puan ang hnawl hnu chuan a party thar lo dinchhuah a tum ve mek a, congress hruaitu te an lu a hai, hmasawnna lam ai chuan an arbo tur te zawnkhawmna hna ah an ram tang a, boruak thim takin Andhra politics a tuam mek a ni.

Committee hian duhthlan theihna point paruk an siam a, a point pakhatna tanga palina hi chu theih loh hulhual a ngaih a ni a. Point pangana ah hian state chu pahnih a thenin pakhat chu telangana state ni in Hyderabad hi an khawpui ni nghal tur a ni a. State dang leh chu Seemandhra (Rayalseema leh Andhra) in zawm tir state siam ve tho a khawpui thar neih tir a ni.Amaherawhchu he thil hi lohtheihloh dinhmunah chauh ti tur a tih a ni. (Page 454)

Point parukna ah chuan Telangana Regional Council din a funding chungchangah pawh Telangana mite duhsakna tunhma Gentlemen's agreement 1956 zulzui a neih tur a ni a.(Page 454)

India ram hi mi chitin awm lungawina leh lungawilohna pawh in thuhmunlo kan ni hlawm a. Sorkarna la duh tan chuan he chona lian tak hmachhawn hi huphurhawm tak a ni. Eng hi nge lo thleng zel dawn tih hi India ram mipui te thlir reng a ni e.


Photo source:http://indiacurrentaffairs.org/wp-content/uploads/2010/12/Sri-Krishna-Committee-Photos.jpg

Thursday, January 13, 2011

Missionary te hnuhma thil tha chu

Fate sap ram a dah thulh duh chuang silo a sapho ngaihsanlohna min tuh tum kan Professor te hi an rilru tak tak hriat ka chak thin. India ram hausakna rawk a mahni ram a mingo te'n min pemsan hnu hian a hnuhma siper hi a tha lam te thalo lam zawngte'n kan lo dawng sawng a. Zoram a thil tha an hnutchhiah zingah chuan zirna piah lamah hian thu mai nilo a thuziah dahthat theihna hmanrua Press min din sak hi a hlu ngawt mai.

A ‘Davos’ hand-operated platen press.
A Chandler & Price treadle-operated platen press.

He thil pawimawh tak mai dinchhuahna atana tha leh zung sengtu Dr. Frazer kha a fakawm thlawt. Kum 1911 a dinin a tir chuan kut a nemkaina khawl (Hand-Press) chauh a nei a. Bible chang tawi te te chhu chhuakin chanchin tha thehdarhnan a hmang thin. Chu khawl chu mawlmang tak ni mahse "Kristian tlangau bu" hi a lo chhu chhuak a, thu leh hla lam a Mizo te tan rahbi pawimawh tak a lo ni ta hial a. Mizoram Bawrhsapte tan pawh hei hi a tangkai hle mai. Bawrhsap Col. Loch chuan khawlchhutna tha zet mai (Treadle machine) kohhran tan a lo hlan a. Kohhran pawh chuan hmang tangkaiin "Loch printing Press" ti a vuahin thu leh hla anlo ti darh tan ta a, he hming hi Synod Press a nih hma zawng a a hming put thin a ni. Tichuan, tuna hmun hi khawlbunna tan chuan hman a lo ni ta a "communication" lamah kohhran hmalakna in nasatakin Zofate kan lo hmasawn ta a lawmawm ngawt mai.


Photo source: http://www.flickr.com/photos/30239838@N04/3370153895/
http://www.flickr.com/photos/sunivroc/3237705433/in/photostream/

Wednesday, January 5, 2011

Kumthar, ni thar, thil thar!

Amak ngawt mai, kum a lo thar a thil thar tha zawk kan beisei a, zingah ni a chhuak a tlaiah a tla leh mai a a ngai vek kha a ni si a.Decartes chuan "i think, therefore i am" tiin hringnun awmzia minlo hrilh fiah tawh a. Hemi hnialkalh hian Kierkegaard chuan "I exist, therefore i am" a lo ti bawk. Mihring ngaihtuahna hian kan nunphung hi a lo va sawi danglam nasa tehlul em! A hun a chu pangngai mahse kumhlunlo mihring hi kan danglam si thin a. Kan nunphung leh ngaihtuahna te hi hun hian a liampui zel a chuvang chuan hun kan dah pawimawhna chhan pawh a hmangtu mihringte thil tih vang alo ni.

Troy movie ka en a ka hriatreng tak chu Greek pasaltha Achilles indo tur a a kal dawn a a nu thu hrilh kha a ni. Troy a kal loh chuan nupui hmeltha tak a nei ang a, fate neiin an hmangaih let ang a, a hlim ang, mahse a thih hnu chuan tuma'n an hrezui tawhlo thung ang. Troy-a a kal chuan thil ropui tak a ti ang a, a thi ngei bawk ang, mahse history chuan amah a hrereng thung dawn a ni. Achilles chuan mihring dangte ang tho in "More (nasa zawk)" neih a duh avangin thi dawn mahse a kal ta tho a. Hringnun duhamna hi chuan chinlem a lo nei lo, hringmi zia a ni a demawm hranlo e.

Ni e, kan khualzin chhung reilo te ah hian kum tamtak pawh hi dam mah ila thil ropui hnutchhiah tur kan neih si loh hi chuan kan va hlu nep thin dawn em. Kan thil tih te hian hun chu hriatreng tlakah a siam a, chumi avang chuan keini pawh hriatreng kan lo ni zawk thin. Kumthar kan chuangkai leh ta a, eng thil tha tak ti ang i maw? Ni ngai vek lo chhuak mahse, he ni hi thar teh chawk a kan ngaih avangin rilru a in fuih thar a, rilru mu hnu pawh a kaitho ngei ang. Mi te tan a malsawmna ni turin i fehchhuak leh ang hmiang. Kumthar, ni thar, thil thar a ni tlat si a.