Lu ti hai Telangana!

Hyderabad kan buai! Kum 1969 atang tawh khan Andhra Pradesh state atanga Telangana state sahchhuah ngei tumin mi tamtak chuan nunna anlo hlan tawh a. Tun hnai mai khan zirlai leh politician te’n thuneitute beng thleng thei ngei turin an aw an han chhuah leh a. TRS Party hotupa KCR chuan chawnghei in Telangana state lo awm theihnan hian a bei a, Sorkar chuan i he lo in a man nghal a. Chumi hnu lawk chuan zirlaite’n (Osmania University leh Kakatya University) nasatakin an duhloh an lantir a, Police nen an inbaihkaih a, Andhra Pradesh sorkar a buaizo ta! Ram a ral muang talo, zirlaite tha ti thum turin an pumkhawmna awm thei ang zawng zawng zirna hmun khar a ni. Hetih lai hian zirlai thenkhat chu thingtlang mipuite support-na beiseiin an lo fehchhuak bawk. He buaina hi rampumin kan buaipui tak avangin a chhan i han chhui ho dawn teh ang u.


“Telangana” chu enge ni? : “Telangana” tih chu telegu tawngin “telegu tawng hmang tu te ram” tihna a nimai a. Andhra Pradesh a district sawm zet mai hi a Telangana tih huam chhung a awm an ni. Chungte chu Warangal te, Adilabad te, Khammam te, Mahabubnagar te, Nalgonda te, Rangareddy te, Karimnagar te, Nizamabad te, Medak leh state khawpui ber Hyderabad te an ni. He ram chhungah hian lui pawimawh tak pahnih Krishna leh Godavari te chu khawthlang atangin chhaklamah a luang bawk. Kan rilru a kan dah tur pakhat chu Andhra state khu hmun hnih ang in a then theih a pakhat chu Telangana leh Andhra hmun pahnih Coastal Andhra leh Rayalseema te an ni.


Hmanlai lal ram : Tunhma India chhim ram lal ram hmingthang Kakatyas kan tih te, Satavahana kan tih lal ram te kha Telangana hmun ngei hi a ni. Kum zabi 14 na ah khan Telangana hi Muslim Delhi sultanate kan tih ho hnuaiah a lo awm tan a. Hemi hnu hian Bahmanis te, Qutb Shahis leh Mughals ho hnuaiah te an awm leh a. Kum zabi 18na a Mughal India ram an tlawm tak khan Asafjahi ho chuan Hyderabad tih hi anlo din a. Asafjahi ho chuan British ho nen subsidiary inremna angin Hyderabad hi an enkawl a. Andhra hmun pahnih (Coastal Andhra leh Rayalseema) te angin British ho thuhnuaiah direct takin a awm ngailo.

India Independent hnu-ah: Kum 1947-ah chuan India ramin zalenna kanlo hmu ta a. Asafjahi hnu a ram awptu Nizam lal chuan India ram atanga inlak hran tum mahse “Operation Polo” hmangin Kum 1948 khan India sipai te chuan India ramah Hyderabad state hi an seng lut ta a. Hemi hnu kum 1953 December khan state hrang hrangte an tawng hmang a zir a thendan tur ruahmanna fel tak zam turin Pu Nehru-a khan committee pawimawh tak mai States Reorganization Committee chu Justice Afzal Ali hnuaiah a lo din a, heihi “Afzal Commission” ti a vuah a ni nghe nghe. Nguntak a he commission hian an zirchian hnu-ah Coastal Andhra leh Telangana mite chu an pahnih tan a that tlan zawknan State pahnihna then an rawt ta a ni. Amaherawhchu thil duan angin a kal talo Andhra Congress mukna sorkar leh sorkar laipui a an hotute chuan state pahnih a then ta lo chuan State pakhatah an chhunfin ta zawk a. Telangana hmunah Coastal Andhra angin Congress an chak ngailo a, achhan ni a lang chu Nizam lal khan Congress chet kha tunhma khan a state-ah hian a phal ngailo a ni.

Mulki Dan chu: Kum 1918 lai daih tawh khan Nizam sorkar chuan Hyderabad-a piang leh kum sawmpanga awm tawh (Mulki) te chuan duhsakna an dawng ang a, pawnlam atang a lo lut te erawh chu hnalakah pawh duhsak an nilo ang tih kha a ni. Kum 1956-a Coastal Andhra leh Telangana an inzawm khan hruaitute pahnih chuan inremna "Gentlemen's Agreement" an tih chu an ziak a, Mulki dan hi siamremin Telangana mite hi ramhruainaah te, zirna hmun, entirnan Osmania University-ah te admission an tan hauhsak an ni a. Kum a lo vei a he dan hi atakin an kalpui lo nge, Telangana mite chu an lungawi ta lo, sorkar chu he an thu inremna zahloah an puh a, sorkar lam chuan an theihtawk an chhuah ve bawk ni in an insawi thiam thung a.

Lungawi tawk a har! He “Gentlemen’s Agreement” hian Telangana mite duhsakna tamtak chu a keng ngei mai a. Amaherawhchu an intiamkamna angin engmah a kal talo. State hming tur ber in remna ang a“Andhra-Telangana” tih tur kha “Andhra Pradesh” an ti hmiah mai a. “Coastal Andhra mi Chief Minister nise Deputy Chief Minister tur chu Telangana a mi a ni tur a ni” tih pawh zawm a ni ta lo!

Kum 1969 a nih meuh chuan Telangana state hran sual duhna hi a lian ta hle a. Achhan ber ni a lang chu duhsakna a hleihluak a Coastal Andhra mite an pek tak vang a ni. Andhra mite chuan Telengana mite hi an hnehchhiah em em mai a. Zu zawrh free taka Telangana a phal, state revenue a vawm luh thur thur pawh itsikin Coastal Andhra lamah suan vek an tum ta mai a. Hnalak leh duhsakna tinrengah kalhlen an ti ta zel mai khan an thin a khei riau mai a ni.

Zirlaite lunga hnur: Kum a liam zel a he thil hian hluar lam a pan ta hle a, Telangana state a lehkhathiam te chuan an sorkar chu an do tan ta a ni. “Jai Telangana movement” tih chu Osmania University te hmalakna in nawr kal a lo tin a ta a. Telangana mite chuan hamthatna an chan ve theihnan theihtawkin hma an la ta a, State hran an ngiat avang a an beihna ah hian zirlai 360 lai chuan nunna an chan phah nghe nghe a ni.

Kum 1968 khan Osmania University-a zirlai thenkhat chu hnalak chungchang leh zirna a Telengana mite duhsaklo a an hriat avangin an nuar ta a. Hetihlai hian Supreme court chuan kum 1969 march thla khan 1956 a inremna dan an ziah-a Telengana mite tan reservation dah ngawt chu constitution kalh a ni a ti bawk a, hei hian an thinrimna chu a ti alh ta hluah hluah mai a ni.

Hemi hnu hian Congress chungkua-ah buaina a lo awm a lungawilo thenkhat chuan Telangana People's Association (Telangana Praja Samithi) tih an din a. Amaherawhchu eng an tih hma in Kum 1971 khan an hruaitu lawk te chu Congress sorkar chuan hruaitu nihna thenkhat pe in a lem zo ta vek a. Hemi hnu reitak chhung chu he boruak hi a dai rih a.

“Telangana” Politics hmanrua-ah : Kum 1990 India ram inthlanpui a lo awm dawn khan BJP chuan Telangana state siam hi rawn tiamin election-ah chuan an tling ta ngei a. Mahse an ni pawh chuan an ti thei ta chuanglo, an tanrualpui Telegu Desam Party duh loh avangin an kut khirh a ni leh ta a. Hemi hnu hian Congress MLA Telangana ram a mi te chuan “Telangana Congress Legislators Forum” tih an din a. Hemi hunlai vek hian tun a chawnghei a sorkarlaipui ngiat mek tu Kalvakuntla Chandrasekhar Rao hian “Telangana Rashtra Samithi” (TRS) kan tih hi a lo din ta a, an party hian Telangana state sualchhuah chu an tum ber a ni. Kum 2004 khan KCR chuan Congress tanpuiin Telangana state siam ngei tumin an bei a election-ah chuan an tling ta ngei a. Congress sorkar pawh chuan chuti mai a chakin a kalpui thei talo. Kum 2008 march thla chawhma lam khan KCR lungawilo chuan Congress a puihna state leh central ah a hnuk dawk a 4MP, 16MLA leh 3MLC te chuan banna an thehlut a. Bye-Election neih a ni ta ngei a. KCR pawl te chu an beisei angin an chak zo leh silo MLA seat 16 ah seat 7 leh MP seat 4 ah seat 2 chiah an chang ta tawk a. Beisei a bo!

Party chhungkua a buai zota! Kum 2008 June chuan TDP hotupa pahnihna an tihmai TDP hunlai a Home Minister ni thin Devender Gaud chuan TDP atanga a ban hnuin Telangana boruak rawn chawktho leh tumin “Nava Telangana Praja Party” tih chu a din a. Kum 2008 October khan TDP pawhin Telangana State karchhuah chu a rawn pawmpui ve ta bawk a. Politics inchirhthehnan tak an hmang ta luai luai a ni ber mai. NTP chuan Telangana state awm theihna turin tan an la ve leh ta a. Kum 2008 November nihnih kha Devender Goud chuan Telangana hi India ramchhunga ram hran a ni tih a puang a. Zalen an ni tih entirnan Thuro sawmlai an thlawh chhuah tir nghe nghe a ni. Andhra Pradesh Secretariat hming “Telangana Secretariat” ti a thlak tum a an kal lai man an ni a. An party worker ten Chikadapalli Police station-ah dharna neiin an duhloh an entir ve bawk a. Kum 2009 November thleng kha chuan thawm hi a reh ta deuh a. Engkim mai chu hotuber mai Sonia Gandhi kutah a awm tihah a tawp ta vek mai a ni.

Enge lo thleng dawn le?: Andhra chief Minister YSR a thi a, afapa la naupang tak Jagan Mohan Reddy in a thlak dawn emaw tih lain Congress sorkar fing tak mai chuan he state politics buaitak chu rawn thlirin Congress leadership chu naupangtak Jagan kutah rawn dah talo in apa aia senior zawk K.Rosaiah kutah a rawn dah ta a. Jagan leh CM amah duh pawl te pawh hian vau ti tih thlem ti tih hian Sonia leh a khawnbawlte an vau ve chhen thin a. Chutia party chhungkua buaitak a an awmlai chuan he thu ngai bawk Telangana chungchang hi a rawn irhchhuak let ta a ni. Sorkar pawh hian hun kal tawh thlir hian nguntak a a kechheh tinreng a fimkhur a ngai a. Telangana State hi sualchhuah a ni emaw nilo emaw, sorkar hian a khua leh tuite himna tur hi a theihtawk a a zawn a ngai a ni. Telangana State siam duhlohna chhuanlam awm ve thei chu Muslim ho in an duhlo tih te, State te zawk siam hian Chhattisgarh state ang a Naxalite te kut a an awm mai pawh an hlauthawnawm tih te hi a ni. Hetiang boruak karah hian kan sorkar fing tak hian engtin nge ro a rel tak ang? tih hi hmuh leh hriat chakawm tak a ni.

Malsawmdawngliana Lailung
5/12/2009

A hmangaih tan a a lemziah chu!

Kum zabi sawmpangngana daih tawhah khan khaw te tak te Nuremberg-ah khuan chhungkua chhangchhe tak mai an cheng a. Pa ber chuan chhungkua member 18 lai mai hrawk chawm a ngaih vangin nitin hahthikul a a thawh a ngai a, an hnathawh ber goldsmith chu nitin darkar sawm pariat lai mai a thawh a ngai reng mai a ni. Chutiang chhungkua atang a sei lian ni mahse a upa lam pahnih te Albrecht Durer leh Albert te chuan duhthusam an nei ve tlat a. An pahnih hian lemziah (art) lam an tui em em a, mahse chumi zirtur a zirna in a kal tur chuan an sumin a tlin mawlh dawn lo tih pawh an hai lo. Mihring hian rilru a kan ngaihtuah a theih ni a kan hriat tlat hi chuan theihdan kawng hi a lo awm zel mai a lo ni.

Sunday tuk khat chu an pahnih chuan ti hian an in rem siam ta a. Coin an toss ang a a chak lo zawk chuan lungalhthei laihna khur-ah kum li chhung a thawk ang a, a chak zawk chu a chawm dawn a ni. Pa khat zawk kum li a zir leh chuan a lo haw ang a hna lo thawk kha a chawm leh thung dawn a ni. Coin an han toss a Albrecht Durer chuan hnehna a chang a, a suangtuahna te tipuitlin turin lemziahna sikulah a kal ta a. Albert erawh chu lungalhthei khurah kum li chhung hnathawk a a unaupa chawm turin a chhuak ve thung a. Ngaiteh! kumli a lo vei meuh chuan Albrecht Durer chu lemziak thiam tak a lo ni hman a. Kum li a zawh chuan a chhungte hnenah a rawn let ve leh ta a.

An chhungkua a Albrecht Durer lo let an lawmna-ah chuan chawhlui an kil ho a. An hun chu hlimna leh lawmna nui ri in a khat a ni. Albrecht Durer chu a lo dingchhuak a, "ka vanneihna hi ka unaupa inpekna zar liau liau a nia, chuvang chuan kei hian hnathawk ve tawhin ka chawm ve dawn a ni." a rawn ti chhuak a. Kilkhatah chuan Albert hian kut khur der der chungin. "A theih tawhloh..a tlai tawh..a tlai tawh.." alo ti chuai raih a. Albert-a chuan lungalhthei khur a hna rim tak a thawhlai khan a kut a hman rim luatah natna pakhat arthritis an tih chu a lo vei a ni. "Unaupa, kum li chhung a hna ka thawhlai khan ka kut te hi vawikhat tal chu an tliak vek a sin..ka tan chuan a tlai tawh..a tlai tawh a ni" a ti a.

Mitamtak chuan Albrecht Durer, German mi Renaissance painter thiam tak kuthnu tamtak nei ni in kan hre thin a. A lemziah tamtak zinga hriathlawh ber pakhat chu "Kut" ti a a vuah kha a ni. Albrecht Durer chuan atan a inpe a unaupa kut lem chu a theihtawkin a ziahsak a, color mai bakah mittui pawh lemziah ah hian a seng nasa hle ang. Mite chuan he lemziah chhan an an han hriatchian chuan an thinlung a khawih em em a,"Kut" tih mai duh tawklo in "tawngtaina kut" tiin an thlaksak ta a ni. He lemziak hi han en mah teh...tawngtaina kut mite tan a inpekna a lang tel tlat a sin! I hmu ve fo tawh thei bawk.

Gospel Retreat Thlirletna

HMCF Executive Committee-in a rel angin memberte thlarau lama kan intuai thar leh theihna turin Gospel Retreat chu 30th October atanga 1st November thleng khan Kanann Retreat Centre, Gatkesar=ah kan nei a. A chhimtu te hi kan zavaiin mi 75 lai kan ni (Mipa-33, Hmeichhia-17, Lang -21, Naupang-4 leh mikhual 2)

Speaker leh a thiante: Bangalore atangin Theologian mithiamrual kan chah a, Speaker-ah Rev.C.Vanlaldika, a ni hi AICS Aizawl-a Lecturer ni reng thin leh Serampore Theological College a lo zirtir hrep tawh a ni a. Thiamna lamah chuan M.Th niin, tunah hian Doctor of Theology (D.Th) UTC Bangalore-a ti mek a ni. A thian Rev. H.Lalthlamuana hi SAIACS Bangalore a lecturer ni lai a ni a. A specialist-na lam pawh spiritual Counseling lam a ni bawk, a ni pawh hi D.Th zir tur a inbuatsaih mek lai a ni. A pathumna Rev.C.Lalrochama hi M.Th UTC Bangalore-a zir mek a ni a. An pathum hian mithiam Pathian hmanlai vek an ni.


Hun hman dan tlangpui: Zing hma tak dar 6;30 am atanga tawngtaina atang a tanin hma kan la chho a. Sermon laklawhah group a inthenin thu ngaihtuah tur te kan khel ho leh zawk chang pawh a awm bawk thin. Mass counseling hi Rev.H.Lalthlamuana’n min ho a. A duh a piang tan Pathian thu lam a in kawmna hun pawh siam bawk a ni. Tv. Lalduhawma IMA hlabu siam thatak chu tui takin kan sa ho a boruak pawh a nuam hle.


Kaldanphung: Thupui “I ram lo thleng rawh se” tih hman a ni a. Pathian thu an rawn sawi dan leh kalpuidan chu “emotional play” an hlauh avngin nitin a kan hman ang chi tur te an rawn sawi nasa ber a. Zirlai tan chuan lehkha taima taka kan zir hi kan rawngbawlna awm reng a ni tih thu te, kan zirchhan chu engpawh nise keimah ni tan mai niloin Pathian tan leh kan ram tan kan hman a tul zia te an sawi uar hle. Kan ram Kristian ram nisi rilru lo tlahniam ta em em te hi Pathian chakna ring a hneh theih ni in an sawi a. Taksa leh Thlarau hi then hran chi nilo in kan kristianna chu kan nitin nunah theuh lang chhuak mai tur a nih zia an sawi bawk. Tunlai thalai te buaipui em em ruitheih thil te, incheina lam te pawh sawiho a ni zel a. Sual leh suallo chin ramri an rawn kham teh chiamlo a. Amaherawhchu khang kan in kan ei te khan Pathian a ti ropui em? tih mahni theuh in zawt a, nitin nun uluk turin min chah theuh bawk. Lum silo vawt silo a awm ai chuan pa tak mai a Pathian duhzawng a awm mai kha kan tih tur a nih zia te. Pathian thu kan chhiar hi uluk leh zual turin min chah a. “Indigenous theology” Mizo te kan hnam zerang mil zawng a a thu te hrethiam thei turin kan ngaihtuah fo a tul zia an sawi chhuak bawk.

Kan hlawkpui em?: Sumtamtak kan seng a kan hlawk pui theuh em?tih chu mahni theuh chhan turah dah ta ila. Kan zirna hmunah te, hnathawhna hmunah te Pathian ram a lo thlen theihnan leh mite tan a malsawmna ni turin min chah theuh bawk a ni.

India ramah chuan Bawng a bu ring ber!

Hmanni chu Library Lawn-ah hian mipakhat a hming Prof.Kancha Illaiah thusawi ka va ngaithla a, chuta thusawi chuan ka beng verh deuh.

BAWNGSA:India ramah hian Caste chak lutukin min phuar a chumi hmang chuan kan vai pathian ringtu ho hian min chaih ta a ni e. Bawng hi ran thianghlimah puan a ni a. Achhan an sawi ber pawh Bawng chu nu ang a ni a, hnute te min pe. India ram 75% a kan hnute ei in hi Lawi atang a kan hmuh te a ni si a. Lawi hi ran thianghlim a nih velohna chhan chu a dum vang mai a ni. Bawngsa ei hnam kan Muslim hnam te hian India ramah ber nihna an hauh mek a a ei velo vaipa chuan an khum meuhlo a nih hi. Bawngsa hi Aryan India a lokal hmasa te khan an lo ei ngei thin tih pawh archeological hmuhchhuana a finfiah a ni.

GANDHI: Tharum thawhlohna thupui hmanga India ram a tharum thawhna thlen tam tir bertu chhan chu amah hi a ni.Hindu lehkhabu thianghlim Bhagavad Gita chu ka lehkhabu a ni tiin a lekchhuak a, chutah chuan tharumthawhna hlir a inziak lawi si a, a thupui ken nen a in mil ta lo! Suit nalh tak ha theiin hrepereng a kaihlui a a mawipui silo. Hnam hnuang hnung Harijan te tan thawk in ti mahse an chhuahna tur kawlpui caste chu a kheng thla duh bawk silo, thil mak dangdai tak chu a ni.

UNIVERSITY AH: IIM, IIT leh Central university-ah te reservation neih an sawisel a, a chhanber chu quality lo mihring an chhuak hnem lutuk ang tih hi a ni. A nihleh quality an tih chu enge ni? Mifing inti eh awp bet tu te hian Khawthlang ram mite ziah an lachhawnga, an mahni in an ziak ve thiam silo. A nih khawthlang ram a mifingte hi i han enteh ang u Adam smith te hi smith chhungkua atang a lo seilian an ni chawk ang, Voltaire te ngat pawh hi chhungkaw dinhmun tha atang a lo chhuak an nih a rinawm bikloh. Lehkhabu in a zirtir piahlamah hian hringnunin nitin a min zirtir hi a lo awm ve zawk a ni. Harsatna dinhmun atang hian miten lehkhabu ngaihnawm anlo ziak thei zawk a ni. Sap pachalho kan tluklohna chhan hi ka Bawngsa ei velo hi a ni mailo maw?...

Pathian tawng chikim hria kan mamawh: Hindu pathian hian sansrkit chauh a hria a a buaithlak. Tawng dang hmang ho tan hian kan ko eih pha velo. Ka nihtum min zawh chuan ti hian ka chhang ang che u. Tirupati a puithiam lalber nih khu a ni. An pathian dah khu english te, telegu te'n ka be duh a, a eih theihloh chuan pathian khu ka sawn ngei ang. Tawng chikim hria pathian kan mamawh.

A dang pawh tam mai ka sawi tawhlo mai ang e. Thusawi thiam tak leh mifing ve tak chu a ni. OBC Reservation Implementation, UGC -a Chairman a lo ni reng a. Ka han en ve mai chuan pa tlawm ve tak hi a ni a. Mahse a thuziah chu khawvel pumin an chhiar a, sap naupang ho zirtur thleng a ziahsak tu a ni lawi si a. A ngaihsan awmna pakhat chu harsatna in a tathriama mi hmantlakah a chhuak hi a ni.

What in a name?

Fapa awh avanga kum tam tawngtaina-ah pawh lo chhamfotu kapa khan ka pian hlim khan ka hming hi am takin "Malsawmdawngliana" ti in alo sa a, ngawiteh "Vanlal" tih pawh a telh tak e. Achhangchiat em avangin kan houtpa in kan matric exam dawn khan min kaihtawi sak ta hi ti hi kan ni zo ta. Ka hming in zui duah duah hi ka chhuangve hle a. Phai ram kan thlen thlak hnu hian buaina ka tawh phah dawn tih pawh ka hrebik hauhlo! Tichuan, Mizo nitalo nafam chua kan zirtirtu te rualin min sawisak sak ta a. Vai puithiam ang mai a min koh chang a awm a "Swamy" ka ni thul a. Dangliana ka ni bawk a.A chang leh Malsawn...An ziak sual ziah bawk a, kan siamtha ngun tlauh tlauh khawp mai. Hming an ziah dawn a piangin pen kalo hum khalh vat a ka ziah sak ta mai thin.

Hming kan phuah a, kan phuahchhan leh kan nun pawh a in persan hle lawi si thin. Thianghlima poh a thianghlimloh chang a awm a, Famkimi pawh a famkimloh chang a awm bawk. Lalropuia inti zingah hian ropuilo fe fe ka hre hnem mai. A nih leh hming kan phuah chhan ber kan phawkchhuah zawh siloh chuan hming neilo hian numberin kan in ko mai dawn em ni ang. Hnailove hming hi kan nihna pakhat a ni a, midang laka min hran tirtu a ni. Rose pawh hi hming dang vuah ila a rimtuina bolo mahse Rose han tih hian a sawifiah ber tho a sin!
Enge in ngaih ve dan...la inhnial chhunzawm turah...hetah hian ka han rek bung ang e.

Keyi Thingtlang khua

Yunan khawpui atang a chhim chhak lampangah chuan khawte tak te mai Keyi thingtlang khua an tih chu a awm a, Axi hnam mi 712 vel cheng ni a sawi a ni. "Hmuntha khua" ti a hriatlar thin a ni bawk a. He khua hi ram tha tak mai a ni a thing leh mau hring dupin a hual nghe nghe a ni. An hmanlai hnam zerang an la vawnhim tlat avangin China sorkar hian a enkawl ulukin a veng ngun hle a ni.

An khaw luh dawn chuan ralvenna kawngkhar lianpui mai hi a awm a. Hehi ral an lokal pawh a venna tur a duan a ni. Khual tha chhawn nan pawh an hmang bawk khawdai a awm a ni bawk a meialh khu kha awm ze neiin an ti khu a chu chu khua a mite'n an mikhual te anlo thleng tih an hriatna tur a ni bawk.Chutah chuan khua a mi te chuan an neih ang ang arsa te, beram sa te, zu te an lo buatsaih thin a. Mi lokal te chu hlim takin lamin an lo lawm lut thin. Khua han luh dawn hian thil pathum tih a ngai hmasa a. Pakhatna ah chuan hnim an hal pakhat kha ke a kan tur a ni a chu mi awmzia chu min thian fai hmasa tihna a ni. He hnah hal rim hian nangmah a thil thalo emaw ramhuai pawh awmse thian thianghlim thei a an ngaih vang a ni a a danglam hle. A pahnihna-ah chuan zu vaimim atang an siam chu in leh tur a ni bawk a chumi awmzia chu i khualzinna hah tak atang khan chawlh hahdamna an pe che a ni tih entirna a ni.
A tawp berna ah chuan zai leh lamin an lo hmuak dawn che a chu chu an hnam mi leh sa ang chiahin an en tawh dawn che tihna a ni bawk a ni.


Mizhi ramhnuai leh Mizhi Kut Chu: Hmanlai atanga tun thleng a anla sawi thin chu an thlahtu hmeichhia pakhat hian Dragon pasal-ah a nei a. Chuvang chuan he Dragon hian an ramhnuai chu rawn tlawh fo thinin an ngai a ni. An khua lal te ho nen chuan hemi hriatreng nan hian ramhnuaiah chuan kal in an inthawi thin a. Hei hi an pathian hnenah chuan hausakna te, inthlahpun zel theihna te an dilna hun a ni.

(chhunzawm tur..sei tlat)

Ei leh in a lo ni!

Ngaihdam dilna: A thui deuh :-)

Thupui changthlan :"Mihring hi chhang (chaw) chauh in a nung lo"....

Ei tur pawi mawhzia sawina pakhat nitho in ka hria!

Hnamzia zirbingna (cultural studies) lama mithiamte’na an ngaihpawimawh em em chu kan ei leh in phung hi a ni. Anni ai mah hian ka thianpa scientist ngat Mahruai-a hian a ngaipawimawh zawk a. Ni tin a mutmawh hnârmawha a neih thin chu ‘ei leh in’ hi a ni. Chaw ei dar hi hrilh a ngai lo a, “I ei tawh em?” tih pawh inthlahrung takin, “Ei tawh e,” a ti vat thei zel a, tluk loh rim hi a nam khawp mai. Tun tumah hi chuan Mahruaia’n buh a lo ngeih tak dan leh buhin a chunga ro a rel dan mak tak mai chu kan sawi rih lo mai ang. Mit ngei a hmuh a, Zirbing mite rawih kher ngailo a hriat mai theih a ni e.

Hmakhawsang atanga pawimawh ei leh in
Mihring nunin hma a sâwn dân, sapêl mi a nih atanga ranvulh leh lo neih dan a thiam hnu, industry lian tak tak a nei a "Digital age" thleng mai hian a thupui ber chu ‘eng nge ka ei ang?’ tih hi a la ni ta reng a. Chumi a nih avang chuan ei leh in hi mihring nuna bet tlat, lak hran theih loh mihring timihringtu a ni. Angelina Jolie atanga ka u Dara thleng hian ei leh in hi kan lo mamawh vek mai. Ni e, chutiang tak a nih avang chuan kan ei leh in hian kan nihna identity a rawn hril a. Mite’n min hriatdan te, mi hausa kan teh dan te, kan ram hmasawnnna te, ram hmangaihna te, kan sakhua nen lam hian a lo inkungkaih vek mai! Chutiang taka pawimawh a nih avang chuan thutak bawlin kan bawl ang.

Zoram zuna kan uaina chhan
Ram dang atanga Zoram, kan ram min ngaihzual tirtu pawh eng dang ni lovin ei leh in hi a lo ni. Thianzaho titi khawm changa kan chil tipût thintute chu- Seventh Day Adventist unauten lo hrethiam se - vawk lu bâwl, chhawhchhi leh dawlrêp, hmarcha nena bai te, saisu bai te, maian bai te, behlawi bai te, vawk thithun leh kawchhung te, bawng chek te, chhangban kurtai a nawr tawk tawk te, khanghu te, thingthupui te; sawi sen pawh a ni lo. Hengte hian kan chênna ram min ngaihzual tir thin a ni. Zân reiah phei chuan sawi ngam chi a ni lo, chil a put tlat tawh. Thil tui tak ei kan châk, kan sawi theih lawk loh te hi kan hriatchhuah chuan chhangban kan emaw te hi a lo ni duh khawp mai. Indian Airlines a bungraw dahnaa leng bâk, rem leh rem loa hand baggage kara kan han keng nam ru veng veng te hi chu a ‘Zo’ tha riau bik alawm. Chuvang chuan kan ram nena min phuar nghet tlattu chu hei ngei hi a lo ni.

Aigupta Sa bel
Khawvela nationalist bera ka hriat Israel ho te pawh hi an bang chuang lo. Jerusalem hawi zawng khera tawngtaia, mi rama an ram hla sak thin sa duh lo ngat an ni. Heng mite ngei pawh hi an history turu berte chu Pathianin thlalera vahmîm a pek thu te, manna a pêk thu te, Aigupta sabêl bul an ngaih avanga an phunnawi thute, ramtiam khawizu leh hnute tui luanna an luh thu te a ni nawk mai. Zoramah ngei pawh kan zaithiam thenkhatin hei hi hlaa chawiin an lo larpui a ni lawm ni!

Babu-a Biryani
Lehkha zira ka awmna hmun Hyderabad-ah hian an ei leh in tur te hi an han sawngbawl nasa thei mai mai khawp a. A chang chuan, kan chawhmeh hming pawh sawi tur ber kan hre thin lo. Ni tina min chhawpsak rasam te, sambar thêr tiau tuau te hi, kan lei tehna fungah chuan khawvel thil tui lo theitawp a siam ni mah se a ram mi Telegu pa tan chuan chaw tha leh tui a ni hlauh thung si. Idlee chhang hang dup mai ei peih loh vangin nernungin hostel cook te kuttum kan hmuh zuau zuau a, mahse kan piah lawka vaipa chuan dawrah man chawiin a lam leh thung si. Kan va inang lo em! Kan thian pakhat phei chuan hostel-a vaiho thil siam tui ti lo lutuk chu, ‘ringtute tihduhdahna’ ti hialin a vui thu a sawi a ni! Lehlamah chuan Afro-Asian games Hyderabad-a neih a nih khan, khatih laia AP Chief Minister Chandra Babu Naidu chuan an rama a ngaih pawimawh tam tak mite’n hre ve se a tih zingah, chhuang tak in Biryani hi a lam tel ve ngat. Infiammi ram hrang hrang atanga lokal te chu Biryani ei vek turin a chah zui bawk. Telegu ho hi India ram pawn hmun hrang hranga awm darh nasa ber pawl an ni awm e. Anni pawh hian ramdang chaw chu tui an tihsak bik lo. An ram an ngaih chhan pawh rasam, sambar leh idlee te tho a ni.

Rawtuai leh keini
Mizo te pawh hian Zoram kan ngaih chhan ber pakhat chu vawksa rep, antam nena chhum te, bawngsa tui hâng han hâwp si hluam hluam te hi a ni ve ngei ang. Kan ramhruaitute inchirhthehna ber pawh ‘rawtuai hâka tlu hlum mai mai tur…’ tih lam te a ni. Eiphung sawina piah b^ka dinhmun sawina a ni. Kan hmeichhiate dinhmun zirbing researcher te pawh hian hmanlai Mizo hmeichhiate dinhmun hniamzia sawia an pawrpui ber chu, Mizo pain, a tapchhaka thu chunga, “Nu-i i bai chhuan a liam!” a tih kha a ni.

Hmawlhte suih leh Chinese
Kan khawchhak unaute hian ei leh in mai ni lo a sawngbawl dan hi an lo uluk khawp mai. Chinese leh Thai ho hian an ei sawngbawl dan chu an thiam em em a, an fate pawh an zirtir chhawng thin. Kan têt deuh laia kungfu film en kan atchilh lai tak tak pawh khan Chinese angin hmawlhte suih nen ngei lo chuan chaw kan ei duh ngai lo. He an ei siam thiamna hi sumdawnnaa hmangin ram hrang hrangah eizawnna tlâkin an taidarh thiam a ni. Kan tunlai thangthar eirawng bawl thiam lo leh buh thlei pawh thiam lo te hian entawn nachang hre tak ang i maw?

Chhang nung lo chhuk
Ei leh in hian kan sakhuana nen lam hian a lo nghawng thei khawp mai. Chhia leh tha hriatna thei ei vangin mihring leh Pathian inkar a lo chhia a. Chutah chhanchhuahna Krista kan neih hnuin vanram khua leh tui nihna kan lo chang leh a. Mihringte hian ei leh in kan ngai pawimawh tih a hriat avang a ni ang Isua pawh khan a taksa chu Nunna Chhang a ti a, uaiin chu ‘...a thisen, mite tan a in tur leh ei tur chu,’ tia a tehkhin ni. Vanram kan ngaihna chhan pawh, riltam tuihal a awm loh vang a ni ti lawm lawm mah ila ‘khawizu leh hnute tui luanna’ a nih thu kan sawi tel hram bawk thin. Kristiante’n kumpui lingleta kan nghahhlelh Krismas kutpuiah lawmdan dangdai a awm chuang lo. Mipui vantlang tana ruaipui buatsaih a ni leh mai. Kristian leh sakhaw dang betu Hindu, Muslim te nen kan inan lohna pawh keini bawngsa, vawksa ei, anni a ei lo an nihna hi a ni mai.

Mi tin ta tur ei leh in
Nu leh pa te’n thahnemngai takin fate an zilhna chhan pawh hi nakin hnua fate tan eitlak (eitur tha pe theitu) an lo tlin theih na tho a ni. Mi hausa leh rethei inan lohna pawh an ei leh in inthlauh dan atang te pawhin kan thliar hrang thei awm e. Infiammite thleng hian ei leh in ngaipawimawhin diet mumal takin ei leh in an insiam thin. Mipa te’n chak lehzual nan theihtawpa ei an tum laiin hmeichhe lamin thau hlauvin ei an lo insum bawk a. Chutianga thau hlauh vanga insumna nasa tak avang chuan tun hnai mai khan nula pakhat la naupang tak model pawh a intihcher tum lutuknaah a taksain a zo lo a a thih phah hial a ni.

Kan ngaihsan sâpho pawh hian an lo hawlh sang vak chuang lo. Nula tlangval inlemna pakhat pawh hi ei leh inna changkang tak restaurant a inhruai tih vel tho a ni. Hemi avang hian a ni ang Michael Learns to Rock hla ‘Actor’ ah khan “…..the fancy car and the restaurant…” a lo tih lawm lawm ni.

I ei zawngin i culture a lang e!
A ni, kan ei dan phung pawh hian kan hnamze thêk tak a tarlang a. Kuttum ngeia India ram pa sek tak te’n kan bar bawrh bawrh laiin sap pa chuan thirfian leh thirkut nen a lo ei ve thung a. Chutianga ti lo chuan Chinese pa chuan hmawlh te nen a lo ei ve thung a. Tui ti taka tep chiam chiam chu Tibetan danah a mawi laiin sap zingah chuan mawi lo tak a lo ni leh thung a. Mizopain thirfian a antui kan hawp rik hrûk hrûk laiin sap pa ngaihah thil mawi lo a lo ni leh thung a. Hei vang hian chaw kan siam dan leh kan ei dan te hian kan hnam bil ziarang a lantir a ni.

Rem leh remlo a Marx-a ngaihdan tawmpuiin :-)
Mihring kan pian chhuahna leh kan seilenna hmun hian kan ngaihtuahna a sawi danglam a. Chuta ni tin zan tina kan hlah ngai loh ei leh in hian kan rilru sukthlek a lo tidanglam hle a lo ni. Heng kan sawi tak zawng zawng avang hian mihring nuna pawimawh ber pakhat chu eng dang nilo in ei leh in hi a lo ni mai lo maw?

ka zinna (Part I)

World Anthropological Ethnological Sciences Congress kum thum dan a an neih thin chu China chhim lam khawpui Kunming in an dawng ve dawn a, chuta paper pe ve tur a sawmna ka hmuh avangin he hmun pan tur hian ka inbuatsaih a ni. He Congress hi China sorkarin a ngaipawimawh hle a million tamtak pawisa a theh chhuak nghe nghe.

In buatsaihna hautak:
Kan University lamah kal hma hian paper work tamtak a han ngai phawt a, admin block a mite’n admission buaipui lai a ni bawk nen hmel hlim min hmuhlo khawp mai. Engkim mai chu che hlek ila naktuk lamah rawn ngaihven rawh tih a ni. Kan thiannu pakhat Delhi a Visa buaipui mai turin a chhuk a lehkha la fel lo te en fel turin kei University ah kala cham bang a. Kal ni dawn thlengin signature kan la la zak zak a. Kal hun a ni meuh chuan ka chau hle tih ka hre chauh a, ka paper ber pawh ka ngaihtuah hman lo! Hyderabad atangin Chennai ka chhuk a, India ram atang a kal tur thenkhat dangte nen kan inhmu hlawm a. Chennai atang chuan Kunming kan pan a Hongkongah reilo te kan chawl tih bak chu kan chawl lemlo a.

Kei mibuai leh ka thlenna: Airport atang chuan ka Indian thian dangte chu Hotel dangah an kal hlawm a. Ka Hotel reservation la chian loh avangin internet Café ka zawng hmasa ber a. Conference buatsaih tu te email in ranglam a ka reservation rawn ti chiang turin ka email a, airport a nghak tawh a ka insawi avangin an rawn chhang rang kher mai. Golden Dragon Hotel a reservation min tihsak thu min rawn thawn nghal a. Ka thlenna address chu ka hum ran a, taxi ka han be ve ngawt dawn a ka hlawhchham der. Ka sawi an hrethiamlo a, an sawi ka hrethiamlo, mangan a hnekin ka hlim zek a. Tichuan, ka kal hma a ka thian Beii te nupa in an thianpa John-a number min pek kha ka hrechhuak a telephone booth ah ka va let leh rih a. Mizo tawng biak theih John (sekibuhchhuaka) ka va bia a nin tihdan tur min hrilh zung zung a, tichuan eng tin tin nge maw ni Ka thlenna hotel chu ka thleng ta tawk a. Hotel-ah chuan khualchhawntu te chu an smart em em vek a buaithlakna pakhat chu English an thiam barlo hi a ni. Conference registration tih nghal a ngai an University zirlaite smart takin minlo chhawn a, sawi ngai bawk English an thiamloh avangin thil sawifiah turin kut phar a ngai nasa hle. Kut kham fe a kan vai hnuin kan thil sawi an man tawk zel a, a hlimawm fu.

Hotel ah chuan keimah chauhin ka awm rih a, atuk tuk leh velah chuan JNU a Professor pakhat in min rawn zawm dawn a ni. John-a’n a tukah chuan min rawn tlawh a. Johna hi facebook a hmel kha a senior nen ka rin ang he hu in alo tar lemlo kan kawm rual tawk vel a nia a fel khawp mai. Ke in min han fan pui tak tak mai a, ka hah hle! Tlai kan haw chu tlangval hi ka damlo nghal bawrh bawrh nghal mai a. Khawpui kan fan lai khan chhin chhiah tlak deuh deuh ka hmu tam hle.

Chu khawpui chu: Kunming khawpui hi khawpui nuam tak "Spring City" emaw "City of Eternal Spring" ti a koh thin a ni. Shillong kan awmlai minti hrechhuak a khua awmdan a sawi lawk theihloh a nihliap nen lo chuan survive ngaihna vang tak a ni. Indo pahnihna lai a China sorkar sipai hmunpui ber a ni nghe nghe.India ram leh Tibet ram nen a in hnim thiak a awm a ni bawk a India ram tan pawh pawimawh tak a ni. Ming leh Qing dynasty te’n he ram hi an lo awp thin a....

Part -2

Conference hian ni sarih a awh a, thil chi hrang hrang entur leh tih tur a awm. Film Festival kil khatah anlo hmang a documentary film hrang hrang entur hmuhnawm tak tak a awm reng a. Nitin chuan panel hrang hrang paper kan khel ho a, zanah an hnam lamin University zirlaiten lam hmuhnawm tak an show bawk a mit leh beng a tlai hle.

Academic Study Villages..tour: To be contd)

Tuai...

Mikhual tak a kan lo en “Gay right” chu tunhnai khan Delhi High Court-in a pass ta rup mai. He thu chhuak hian India ram sakhua hrang hrang Kristian ni lemlo te a rawn sawinghing a. Congress sorkar leh BJP chuan a thlithawtna lam zirchiangin engmah an sawi duhlo a, Left party chuan a lo thlawp a. India ram milar hrang hrangte’n he thu chhuak hi an lawmpui thu an sawi bawk. Nangin engtin nge i lo dawn sawn ve le?

Mizo leh tuai: British record kan en chuan “Tuai Khawfang” awm thu leh khap an nih thu hi hmanlai Mizo te zingah pawh a lo awm tawh a. Tunlai Aizawl kawtthlerah pawh zak maplo in an kal then then ngam tawh a. Thil thar em em a ni hranlo, thar ta zawk chu dan huangah an rawn lawi ve ta hi a ni. Mizote zingah pawh ngaihdan a phir thu nghal mai. Ringtu kan nih angin engtiang a lo dawn sawn tur nge tih thuilo te in kan han chhui lawk dawn a ni.

Enge an sawi le?: “Hetiang a siamtu Pathian duan hi kan ni. Mihring pangai kan ni ve tho a, mahni pian ang nen kan khawsak dun hian tu engmah pawi kan sawilo a, tumah kan tibuai bawk lo. Tunlai a hnam leh chibing rahbeh ang hian rahbehin kan awm a zalen hi kan phu a ni.” tiin. He mi tanfung tinghet tur hian gay Right activist te chuan zirna pathuam an quote fo thin (Hamer’s X-chromosome research, LeVay's study of the hypothalamus, Bailey leh Pillard's study of identical twins who were homosexuals.) He mite hian tanfung tha deuh deuh gene danglam vang a awm an ni tih ang te in thu rawn nei mahse han chhui chiang ila anmahni pawh hetiang mi tho an nih vang a ni. Chumai bakah scientific proof an tih te hi midangin an enpui lemlo hi a makna lai a ni. Secular zirna ah hian Psychology a zirna huangah Tuai te tanfung ti tha turin theory hrang hrang an vawrh chhuak bawk a, chuta zinga hralh tla tak pakhat chu Post-modernism kan tih hi a ni!


Bible in enge a sawi ve le?: Genesis bung khatna leh bung hnihna kan en chuan mipa leh hmeichhia Pathianin a siam thu kan hmu a, “Tuai” a siamlo! Adama leh Evi a siam a, Adam leh Steve emaw Madam leh Evi a siam hauh lo. Chhungkua din a Amah chawimawi a leilung hi dapchhuak turin mihring hi a din a ni. Neih in ang ve ve tan chuan inthlahpun hi a harsa ngawt ang. (Thufingte, 22:6) ah chuan “naupang chu a kalna awm kawngah chuan zirtir ula, a upat hun pawhin a thlahlo ang,” tih kan hmu a. Engtin nge Pathian pawm hauhlo a khawsa a chhungkua din tum chuan an fa lak pawh enkawl dawn nise an enkawl that tehlul ang.

Zirtirna diklo: Kohhran thenkhat (Liberal Church) te chuan mipa leh mipa in hmangaihna a diklo tak a hmanna ang chi(erotic) hi Bible pawhin a pawm angin an sawifo thin mahse heihi a diklo a ni. Jonathana leh Davida in hmangaihna hi hurherhna lam a nilo unau ang a in hmangaihna a ni a (1 Sam.18:4) Juda pawhin Isua a va fawh khan an hnam inchibai dan a va fawp a ni.

Alo phal chiah em?: (Leviticus, 18:22) leh (Leviticus, 20:13) te kha han keu teh le. “Hmeichhia angin mipa i pawl tur a nilo, thil tenawm a ni.” “Miin hmeichhia a mutpui ang a mipa a mutpui chuan thil tenawm tak an ti ve ve a ni a, tihlum ngei tur an ni;an thisen mawh chu an chungah a awm tur a ni.” Sodom khaw sual takten Lot-a mikhual vantirhkohte mutpui an tum thu (Genesis, 19:4-5) ah khan kan hmu a. Pathianin nasatakin a hrem tih kan hmu zui bawk. (I Korinth, 6:9-10) na kha en leh lawk ila. Vanram kailo tur list ti hian a sawi a, “…Bumin awm suh u; in ngaih hmangte emaw, milem betute emaw, uirete emaw, mi hurte emaw, mawngkawhurte emaw….Pathian ram an lut lo ang.” Tunlai mi ilo ngaihsan tak tak te khan awihawm awm tak takin an lo sawi pawh a ni thei, bumin awm suh, hremhmun direct ticket neihna a ni.

Beiseina: Pathian tha tak mikhawngaih thei tak nei kan nih avangin simte tan chuan Pathian hian kawng a hawng reng a (Rom, 6:6-7) ah chuan ti hian kan hmu, “Hei hi hria ila: Kan mihring hlui chu a hnenah khenbehin a awm ve ta, sual pu taksa chu tihborala a awm theih nan, tuna chinah sual bawihaha kan awmlohna turin. Tupawh thi tawh chu sual lakah a chhuak tawh si a. Tin, Krista hnenah kan nung ve bawk ang tih kan ring a ni.” Kan awmna environment avangin kan rilru alo danglam a ni thei, thil sual va tih kher hi a sualna lai a ni. Sim a Pathian hnen a let duh tan kawng zau tak hawin a awm a. BIblein a phal miau loh avangin han support viau chi a lo ni hauhlo, kan unau ngeite hremhmun an kal kan pawi tilo tihna alo ni daih mai!

Caption in phuahsiakna

Model te- Tlinga, Zara, samuel, me, chhum, fanghmir (langthamlo) and lungtum lianpui

A duh duhin han phuah teh u phuah ngial ka tum ka rilru awm ang a phawchhuak zo tlatlo!"Look east policy" dik thei silo :-)BTW he photo hi Epistemology lak a nih hi :-)

Appreciation of a poem

The Night Has A Thousand Eyes

by Francis William Bourdillon

The night has a thousand eyes,
And the day but one;
Yet the light of the bright world dies
With the dying of the sun.

The mind has a thousand eyes,
And the heart but one;
Yet the light of a whole life dies
When love is done.

(Any one)

Ka Pa

“Ka Pa” ti a ka koh lohna kha kum tam a vei ta! Hreawm tuar tawhloin min mut hahdam san tawh a, vawiin ni ah hian ka ngaih a zual kher mai. Tlai a hnathawk rawn haw ka nu nen kanlo bihruksan der thinlai te kha a ngaihawm mai mai. Dilchhut tak mi ka nih avangin zawhna hlirin ka khat thin. Ka nu leh pa te hian ka zawhna chhan an ning ngailo a. Zan rei takah pawh arsi enzia leh enchhuah dan sawifiah turin min thawhpui peih a. Ani, Police form min leisak lai te, gun belt nen kan inkhawmho lai te, ka zirlai min zirpui a strict thin zia te, kan halpuah hal ho lai te kha. Khatiang hunte chu kum tamtak kal tawh te an ni a, kohkir leh theih an ni silo.

Ka lung a leng!

Khawlum avangin ka leng chhuak tha peihlo a, ka lung erawh a leng khawp mai. Vai ram ropui zia leh kan ram khian a tluklohzia te hre em em mah ila, ka ram ti a ka chhal ve khian ka nunah hian thuk takin pawimawhna a nei. Ram leilung leh mihring lo inthlunzawm thuk dan hi ka ngaihtuah ve neuh neuh thin. Hmun hian kan nihna (identity) pawh hi a lo keng tel ve ngei mai. Mizo ka ni a, ka hming ka sawi pah hian ka awmna veng ka sawi tel ziah a ngai. Vaiho pawh hian chutiang hreve sise lemlo mahse North East mi tiin min hre ve tlat a, Mizo ka nih piah lamah hian kan awmna kil khian pawimawhna a nei em em a ni. ‘Global village-ah kan awm tawh e’ tiin uar takin sawi thin mah ila, kan awmna veng bik te hi chuan ngaihpawimawh ala hlawh chho tial tial dawn a ni.

Hmun thenkhat chu kan hmangaih tak kan thenna te, ropui tak a kan lenna hmun te, kan chetchhiatna hmun te a nih avangin kan hrereng duhin kan hrereng duhlo fo bawk thin. Chu hmun leh kan nun chu a inphuar tlat avangin ka thinlungah hlatakah pawh awm mah ila kan vawng tlat a kan thihna thlan thlengin vawn nun kan tum thin. Hei vang hian a ni ang e novelist Pat Conroy khan “My wound is my geography, it is also my anchorage, my port of call” a lo tih na chhan kha. A hmun a kha amahin a pawimawh pawh a nilo a kan thiltih a zirin a lo pawimawh zawk a ni. Hnam thenkhat Maori tan ekin hi hmun pawimawh tak minung leh mithi inkalpawhna kailawn a nih lain keini tan chuan ekin, chanchinbu chhiarna te pawh a ni ve thei tho bawk. Ni e, High school field tepawh hi kan Mizo footballer tamtak inchherchhuahna a nih laiin zak tak a football ka petna hmun te pawh a ni ve bawk. Hmun in ang theuh te pawh hi a thlirtu mit atangin a hlu in a hlu lo mai a ni. Chuvang chuan chhan hrang hrang sawisen loh te avangin Mizoram Aizawl khi ka ngai takzet a ni.

Ka in nuam Hyderabad!

Ka nu in Aizawl atanga Hyderabad ka chhuk dawn khan a thiante hnenah, "A haw leh tawh dawn a ti!" Ka haw na chu ka in ni tur a nia, Hyderabad-ah hian in lah chu ka nei der silo a. Engdang vang nilo in ka awm rei tawh em a ni. Kan thenawmnu phei chuan lehkhazir ka hriat tawhah ila zir rei ber min ti! In daihlo tak a hun kan hman ve lai hian a thlirtu tan chuan a rei thin si a nih ber hi. Mizoramah reilo te ka han cham a ka thil han buaipui thenkhat te.

Pro fight: LPS lamin boxing promotional/Professional fight anlo buatsaih kan chhungkua in kan buaipui. Ka nute khawhar a hnem a, zan dar 8:00pm kan nghakhlel tlang hle.Artalh buai ka peihloh avangin cake ka leisak a birthday lawm ang hrimin a chak zawk kan in rinsiak thin a. Ka nu leh kan nau awmpuiin an han sawi tak tak chu boxing khawvel ka hriatloh zia ka inhrechhuak. Kut lek thiamlo deuh keini chuan vai velh ngai ah pawh hliampui kan tuar phah zel a. Ka tih ve turah ka ngai lem lo :-)

(to be cont'd....ziah mood ah ka awm lehlo... :-))))

A lum!

Heti khawp hian dimna neilo in min sawisa tawh a. Thlan bawrh bawrh chung hian atan ka han thai ve rere teh ang.Tunlai chu kan khua leh chhehvel a mite hi min ngaina zual nge a theih ang tawkin a rawn lum huam reng mai a.Vai dum leh zualte hmuh chang phei hi chuan a lumna chu a zual thin! Van lam hawi ngamloh khawpin ni a sa a, ni ber mai khi tunlai hian a intisek nge maw ni? Damna ber chu AC a awm a ni tawp. Chulah chu kalo nei ve bawk silo a, neih tawk cooler in kan inchhem hritlangbur a. A lum tih han sawichhen pawh chu tawng tam nihna mai mai a lo ni bawk, sawt bawk silo.

Chuti tak a ka hringnun tibuai mai chu hla te hi anlo phuah hial lo maw hemi pual hian ti in youtube ka han hawng a. Ka hmuh thenkhat te- Avril Lavigne - Hot, Kate Perry Hot N Cold OFFICIAL MUSIC VIDEO, Red Hot Chili Peppers - By The Way, Handsome Furs - Radio's Hot Sun te a ni. Kan lum sawi dan a in anglo mai thei bawk :-)

Ka thuziah tihtawpnan rappers Nelly khabe ka han hawh ang e, "Hot in.....So hot in herre.....So hot in....."

Hello world

Kar tam ka NEt in min peihloh san a, ka beidawngin a that hnu pawhin ka peihlohsan ve ta daih a. Rilru-ah thu leh hla a awmlo bawk a, mi ziah pawh ka chhiar peih chuanglo. Ka chhang kham ve deuh a ni ber e.

Who am I?

Who you are defines what you do.. or What you do defines who you are ...or surely it's not what you do...it's the way you do it....(Conversation from the movie Across the Universe)

Enge i ngaih ve dan le?

Block bloging!

Ka naute blog ka chhiar, a ngaihnawm hlawm khawp mai. Kei ve chu ka rilru a in block miau a ziah tur der ka hrelo. Ka hriatloh thu tal hi ka han ziak hram a ni e. Khua a lum chho a tuihna ang deuh a rawn chhhuak heuh heuh thin kha ni sat luat vang nge a kang chat tlat mai!

Hringnun pawh hi ngun tak a chhut chuan engmah a lo ni lo!

Aw hmangaihna sawi thiam ila (Orkut thawnthu modi version)

Khawvelah hian a nilo chu engmah thlakhleh dang ka neilo a. Amah chu ka nun leh chawlh hahdamna a ni. Mite pawh hian hmangaih te chu an lo nei ve fo tawh ang a, a chin tawk pawh an hre viau awm e. Kei zawng ka thiamlo chhiava a, min ning ang tih pawh ngaihtuah changlo hian ka lo phur leh chiam thin. A bula awm hi ka kham thei derlo a, minute reilote pawh hi kalsan har ka ti. Chutiang a ka khawvel nuam tak a ka hmanlai chuan beiseiloh deuh thil a thleng ang tih pawh ka chhut ngailo, chhut pawh ka duh heklo. Chu hun chu chelhdin theih nise, ka chakna zawng zawng sawm khawmin ka bei ngei ang.

Ka hming kala hrilhlo tak che u a, Orkut Buyukkokten a ni tawp mai.Turkey khawpui pakhat Konya-ah kan cheng thin a. Standford University-a PhD Computer Science degree nei ka ni. Tumkhat chu ka thiannu chuan khaw dangah tul thil a awm avangin min kalsan zawk a lo tul ta a. Reilote min han kalsan tur pawh chu ka ngaithiam lo ngang mai. Tichuan, lung silo zetin Train station-ah chuan ka thlah ta a. Rilru a ngaihtuahna kawm chungin ka room ka thleng a. Rei a nilo, thu thinthawng tak chuan min rawn deng chhunzawm nghal a. Ramhla tak a kal tur ka thiannu te chuanna train chu a chesual a nih chu. Rang takin ka thawk chhuak nghal a. Railway thuneitute ka be thuai thuai a, officer te an lo fel a tawhsual tawk avang a thi te list pawh min hmuh tir thuai a. Ka han en a a hming reng reng ka hmu zolo! Ka keu nawn ka keu nawn a, ka beidawng tan ta hle mai. A hnuhma chu a awm eih silo a.

Kum a lo vei a, IT technical architect ni in ka zirna ah chuan kalo hlawhtling ve ta em em a. Tichuan, ka rilru a thi theilo ka hmangaih ngawih ngawih zawn chhuah dan chu ka dap tan ta a ni. He khawvel khawlai hmunah emaw chuan a awm ngei awm si a, min han be pawp mailo pawh chu ka thin a rim lek lek fo thin. Tichuan, khawvel hmun hrang hrang a computer thiam developer te ka sawmkhawm a, internet site pakhat orkut tih hi kanlo siam chhuak ta a ni. Beidawng duh hauhlo in kum thum chhung rim takin he web atang hian ka zawng a, sum leh pai pawh maktaduai chuang kalo seng ta reng mai. A tawp a tawpah chuan he orkut hmang hian khawvel a ka hmangaih ber chu kalo hmu leh ta a ni. Hemi ni a ka lawmzia chu I hrethiam kher awmlo e, ka lawmna kha engmah hian ka thleng phal lo a, ka sumsen leh ka tha sen, hun sen ve te zawng ka hmuhchhuah a ropui em vangin ka chhuang thei hlek lo. Tichuan, ka thil zawn ber ka hmuh tawh avangin ka web pawh chu khar ka tum rilru ta a. Mahse mi tamtakin he site hi an hmang tangkai avangin google CEO chuan leiah min dil a, kei chuan midangte tan a tangkai a nih beisei ve in kalo remti thei ta a ni. He site hi hmangaihna atanga chhuak chhelna a din a ni a, a hmang tu te pawhin ka rilru ang hi min tawmpui ve thin se ka ti khawp mai.

Hmangaihna avanga ka thil siam avang hian engkim huam leh engkim seng hrehlo khan ka hmangaih ber ka hmuh theih phah a. Kum 2009 te a nih meuh chuan khawvel a mi hausa tawntaw te zingah pawh minla chhiar ve mahna. A engpawh nise heng zinga ropui ber chu hmangaihna avang a beidawnlohna hi a ni.

Photo: Orkut Buyukkokten creator of orkut
source-jaysfreespace.blogspot.com

Arunachal ah ka han "Chal" zawk a!

Tlangval senior tarmit bun ve mai min ti maw?
Zin tur ka nia Itanagar-ah, ka flight chhuah hun ka en sual a ni. Tlai lam emaw tiin ngaihngam takin ka mu sik sik a. Ka thawh chuan ka online-a ka ticket lakna te a hunte an sawn takin tiin ka bia. “Tunah chuan a thlawk sang tawh ngawt ang”..tih ka thudawn a ni. Tichuan, nuihzalo takin a tuk a mi turin ka book leh a. Haihawt hi senior tawh vangah ka dah duhlo a fimkhur loh avang a ni, fimkhur tak chuan a hma zan te khan ka ticket ka en ve thlap si a. Tlai a kal tur angin ka in ngaihluat vang a ni e. Tlangval senior tarmit bun ve mai ka lo ni.

Tlangval senior tarmit bun ve mai kalo nilo!
Kolkata kan chawl zawk a, Guwahati panin kan thlawk nghal a, kan thlen veleh zan a chhuak tur Bus ticket ka la nghal a. A zanah chuan Itanagar panin ka chhuak ta a ni. Arunachali pakhat fel deuh mai ka be pawp a, ka kal na hmasak ber a nih avangin ka chhukna tur min hrilh turin ka hrilh a. Arunachal chu zing dar 4:30 ah kan thleng a. ILP vel an check chuan keichu an mi leh sa a maw tiin min kal tir mai a. Nerist gate-ah ka chhuk a ka hawi kual ka hawi kual. An Research Scholar pakhat hian motorin minlo nghak vang a. Ani pawh putar deuh beisei a milo hmuak a ni bawk a , ka hmel la naupang tak chuan a bum ve nasa a niang. Tlangval senior tarmit bun mai kalo nilo! Tichuan Guest house an kan tlan nghal char char a. Kei lah pek chuan Hyderabad atangin internet ah Arunachal temperature ka en a, kawrlum kenloh pawhin tih theih mai dawn hi tiin ka kenglo vei a, ka tisual chhiava, ka khur nasa hle. Guest House ka thleng a, tuilumin ka inbual a, ka mu nghal daih. Zingah chuan min sawm tu pa ber Dr. M.C Behera kawng a rawn kik a kan in satkak hnuin dar zing dar 9:30 ah a tan tur a nih thu min hrilh a. An dining Hall ka va kal ve a, putar, pitar, kum upa lam deuh ho hian polite takin minlo nuih sung hlawm a. Ka riltam tawh lutuk mi ka be peihlo puri sa ve vawt chu ka lim ngheng a, ka nung ta deuh.

Kan tan ta:
Session kan tan a Professor thiam tak tak thusawi mut ti chhuak deuh deuh kan ngai thla a, mahse ka hun a la thlen veloh avangin ka harh a ngai tlat si a. Ka hun a thleng a, ka flight miss thu te ka kalna a hlat bik zia te ka sawi a, fiamthu kan thawh ve ngial a, an nui dar dar lem hleilo a. Tichuan, ka inbuatsaihna ve ang ang te ka han sawi zo ve hram a. Heng aimah hian thil ngaihnawm deuh chu kan session chair chu NEHU Vice Chancellor ni tawh Dr. BD Sharma a ni a, LK Advani hi a ang ber awm e. Kum 1985 vel khan NEHU ah hian VC a ni tawh a Professor pahnih chu an thatchhiat luat avangin a lo suspend tawh a ni awm e. Indira Gandhi thian hnai tak a ni bawk a, engmah a hlau velo ni awm a ni. Hetiang a ka ngaihsan ve ruk em em hma a thu sawi ve tur ka ni hi ka hlauthawng deuh a ni. Mahse, rin ai takin kan ram thil sawi ka ni bawk a, tuilo mahse ka tui em a ka vai liam ve thei ta mai a. A hnu session te chu ka ngaithla tha vak tawhlo a, ka chhuak ru a, an campus thla kalo la tiah tiah mai a ni. An mi sawmte hi University Professor leh Reader tribal area tak tak a thawk leh lehkhabu te pawh nei tawh nual an ni a. Asst. Professor tlem leh research scholar pathum IIT Mumbai atang a lokal leh Uk atang a lo kal a awm bawk a. An lehkhabu a ngaihnawm ang hu in an tawng chuan mut a ti chhuak lawi!

Sightseeing:
An zirlai te an fel a University Bus pakhatah chuangin Buddhist Monastery pakhat ah min hruai a, thla ka la phei zel a. Vai ka kalpui ho chuan tlang leh ruam mai mai te chu mittla dawn hian an en hlawm, hetiang ai a nalh te chu Mizoramah kan neih tehreng nen ka ti rilru a. Buddhist monastery ah chuan thing pakhatah hian ribbon anlo hreng var chhuk mai a. A awmzia ka zawh chuan duhthusam a tichuan ribbon kha an suiha an duthusam chu a lo thleng thin. Keipawhin ring em em lo mah ila ka han tawn ve ngei kha, ka duhthusam zawng ka sawilo mai ang e.

Guwahati ah ka let, Hyderabad ah pawh: Chumi zan lala ah chuan Bus a chuangin Guwahati kan pan leh ta a. Delhi lam a an Professor pakhat chuan min kawm ngeih tlat mai a, “Mizoramah kal ka la duh a ni” te a la ti ta deuh deuh a. Mizoram House-ah tlawh ka sawm der a, a lo phur nasa mai a. Kan va thleng a Mizoram House thawk te an lo fel tak zet. Kan phu miahloh roomah minlo nghat a, ka lal ve ta viau emaw tih pawh a awl khawp mai. A tawi zawngin Professor chu chawhnu dar 2:00 ah a flight a nia, ka vailiam a. Keipawh ka flight kha tlai dar 4:00 ah a nia, sum insen thlawn ka duhloh avangin a rang arangin Airport ka pan nghal a. Zanah Hyderabad ka thleng tihpalh thil thu nge ka thianpa Mathanpuia leh Tlingan minlo hmuak ve teh mial a, an fel khawp mai chithlum mum ka la lei ang. Hyderabad-ah chuan awmna bur leh hnarping takin ka thleng tih ka hrechhuak a. Ngaiteh! Hna hlir hian minlo hmuak leh a. Huiham khawvel tak hi chu…

Chhawrhthlapui khi

Electric eng la awm hma atang khan zan khaw thim hnuai a awmte tan enna a pe thin. Thinlung a hnemngai lungleng vawng vawnte tan hnemna a pe bawk. Van boruak kan thlir vang vang a Pathian thilsiam ti ropui a ti mawi zualtu chu thlapui a lo eng pum mai hian a ni. A then chuan mihring finna atanga chhutin an han in kap kai a, a then chuan hla ah chawiin lunglen hnemnan an hmang fo thin bawk chung zingah chuan Don Henley hla Talking to the moon pawh hi a tel ve ngei ang. Mihringte hian kan va chhawr mawlh mawlh tak em! Thla (Moon) han tih hi Germanic thumal a ni a, thla (month) tihna a ni awm e, leimite’n hunbi kan chhiarna thatak Zan ti zan tu chu he thla bawk hi a ni. Hnam hrang hrang te’n tawng hrang hrangin kan thiam ang tawkin chu van a ropui taka inzar chu kan ko theuh hlawm a. Kan naupang inawih lemna ah pawh a ni ang tluk a chhawr rim kan neilo, “Thlapui lo tla rawh, matea hian a lo awrh nelh nelh ang che.” Chutichuan naupuak lai pawh chuan suangtuahna nen chu thla vansang tak a awm chu a thlir vawng vawng a, engemaw tak chuan a muan ni tur a ni a muhil ta siai siai a.

Hmanlai mite phei chuan a biak hialin an bia a! Kum maktaduai tamtak atanga rawn awm tawh a ni a mihringte nunah hian ala pawimawh dawn chauh a ni. Greek ho pathiante Selene and Phoebe leh Artemis te hi thla a hmehbel leh hmeichhia ni a ngaih a ni. Ni hi mipa anga ngaih a nih avangin thla hian nu nihna keng bikin an hria a, inchhunga nu uap a nawm angin zan thim hnuai a nu berin a uap tlat mai chu a muanpui a ni. Lehkhabu tamtakte a ni avang hian a rawn piang chhuak a, suangtuahna ram a an chawi film engemaw zat he thla vang hian a lo piang bawk. Chumai nilo kei tak pawh hian zaninah hian thla vang khian thil ka ziah phah ta a nih hi, chhawrhthlapui a ni miau a.

Photo credit:Epistemology

Knowledge is power

He thu hi mithiam deuh pakhat taite-a Pu hian a lo sawi tawh tak e. Thiamna hian thim ata engah a hruailut thin. Thiamna duhin kan tet lai atangin school kan kai a, kan zirzo tak tak theilo, kan thihni thleng hian kanla zir zel dawn a ni. Ka zirna bung changkhat a hun lo awm ve chu University of Hyderabad hi a ni. Chuta kan titi khawmna chu heihi a ni e, finna tamtak heta tang hian i chhar chhuah ka beisei.

1.Zawhna: Sava pathum hi thingzarah insi thapin an fu hlawm a, an thlawk darh a, an rawn let leh chuan an han fu leh vek dawn a; mahse pakhat chu a leng ta lo a... Enge a chhan?
chhanna: Pakhat kha a lo kar full a tin ni...

2. Zawhna: Khawvel lai takah hian enge awm?
Chhanna: W mawle... ngaihtuah hah duh vak suh.

3. Zawhna:Luiah hian thing a in kham ruah mai a, a lai tak chu tuiin a chim a, sazu hian a rawn zawh zai zai a , huh miahloin a rawn thleng, enge a chhan?
Chhanna: Thinglian pui kha a kawrawng a a kawrawng chhungah a rawn kal zet zet mai mole.

4. Zawhna: tu emaw pakhat hian tu emaw chu kapa a tia, mahse chu emaw pa fapa chu a ni hauh silo a...enge a chhan?
Chhanna: A fanu a nimai a..heihi chu common tlat.

5.zawhna: 1 leh 1 belh hi 2 i ti maw? 3 a ni ve thei bawk..
Achhan: belh sual changin...

A ho e mai duhtawk ang.. ilo fing ta sawt chuan ka ring lo e. Time pass mai mai a ni e.

Reference:
1. taitea.2. Es-i. 3. Ahlimi, 4. achhuana

Hahdamna famkim (Beiseina)

Taksa alo chau a natna in min bawm chang te hian damna tur a kan ngaih damdawi kan ei thin. Rilru a lo chau a, engemaw avanga kan kun tlawk tlawk hian chhawktu kan dap a kan dap thelh fo thin. A then chuan zu leh sa ah an tlak a, an rilruhahna kha chhawk an tum a ni. Amaherawhchu an han harh chhuah leh meuh chuan an natna te kha a lola bo awzawnglo mai. Rilru hah takin an meng vel ruai a, thian kawm an thlahlello a, an in dawm kun tlawk tlawk thin. A then chuan ngaihtuahna thlak danglam theihnan taksa insawizawina lam an bei chiam bawk thin. Mahni a an awm chang a lo awm leh ngei a lungngaiin an rum leh fo bawk. Mite hriat chu zahthlakah an ngai a, an tawm im chawt a, mal tawrh phei chu a lo pun deuh deuh zel leh nghal a. Thente chuan thiante bulah an ngaithla peihlo ang tih pawh ngaihtuahlo in an natna an in bunruak thin, ven pawh a veng ve hawk thei awm e, mahse an natna chu an bun chhuak zo silo. Engtin nge nita ang le? Chuta tang chuan chhuahna a awm ngei tur a ni. Kan ngaihtuahna (Chhia leh tha hriatna) hi daw thin mahse thinlung chu a daw ve thei silo, a va han buaithlak zo zai em!

Lawm a har a, mite hriatloh hian an rum a, zanrei tak thlengin an tal an tal thin. Pathian pawh hian engvangin nge hetiang dinhmunah hian a dah le? Chhan tha tak a awm ngei tur a ni, engkim chhan nei a siamtu a ni si a. Bible-ah hian chhanna a lo awm reng mai a, Jonah kha Sangha lianpui main nithum zet a dawlh a. Sangha kawchhungah khan tih tur a awmlo hle, thian kawm tur a neilo a, lehkhabu chhiar tur a nei heklo, a thim mup mai a ni. Jonah khan enge a tih le? Pathian hnenah a tawngtai a ni.

Chutah le Pathian chuan a hun a tihah chu lungngaihna thim a tang chuan a chhanchhuak a Nineveh khawpuah a tirta a nih kha. Kha lungngaihna Sangha lianpui chhung a a awmlai khan engmah a tih a ngailo a, in dawmkun chiam pawh a tul hranlo a, chhanchhuak thei tu diktak Pathian koh kha a tih tur a ni.

You hold my world in the palm of your hand.. a line from With all i am- Hill song
Chhanchhuah an nih hnuah chuan mite dinhmun an hrechiang zual a, "tap tawh suh, theihnghilh tum rawh," tih lamin mi an hnemngailo a. "Pathianin I hnen a thusawi a tum che hre turin I beng dawh zawk rawh" an ti thin zawk a lo ni. Kan chung a thil thleng reng reng hi ama hriatpuiloh a awmlo a, kan tan a thatna tur vek a lo ni zawk thin. Mahni hian kan phurhzawhloh hi chu phurh tum lo ila, a phurkang thei Isua hnenah hian in nghat ngam ila, kan phurrit te chu a lo zang thin.Vawn chhan tur kan neihloh tak tak hian lohtheihloh hunah hian Pathian kan au chawk thin. Kan han auh meuh chuan tanpui vartu hnai ber a nih leh hmangaihna namenlo a a minlo kuangkuah hrehlo tu chuan kan lungngaihna atangin minlo khai chhuak thin. Kraws kawng a zawhna ah khan tun a kan lungngaihna te pawh hi a lo phur tel a ni tih hriat a tha. Phurhzawhloh engmah a nei silo a, chuvang chuan AMAH a kan innghah thiam pauh leh kan nun a lo zangkhai ang. Hmangaih Pathian a nisi a.

Tlang lamah te khian ka mit ka len chho ang ( In dawm kunlo in) Min tanpuitu khawi atangin nge lokal ang. Min taipuina tur chu Lei leh Van siamtu hnen atangin a lokal ang... Thlamuanthlak fu lo maw? In dawm kunlo in han dak ve teh van Pathian thilsiamte khi a nalh a nia. Dam chhan thatak i nei a nia.

Picture credit :www.westsidevictory.org
http://www.lewistownalliancechurch.org/

Hawikhawthawng (Nizam te lalna zam velah)

Miropui te ropuina karah hian midang kut tha chak tak a awm ve thin. Chu chu history chuan a hmuhhmaih fo thin. Kan naute study tour turin kan hruai a, Paigah’s tomb hmanlai Nizam khawnbawlte thlan marble a mawitak a chei chu kan va tlawh a. A hmun kan va thleng a, zahna lantir nan ka pheikhawk ka phelh a dimtakin an thlan chu ka thlek vang vang a. Paigah Khawnbawlte hi Nizam Salabat Jung hunlai atanga lal hnathawh a puiin an kut leh ke an ni a, India lal tamtak ai pawh a hausa zawk a ngaih an ni. Hazrath Omar bin Al-Khattab (Razi ALLAH Hu Taalha Anhu) Caliph pahihna an tih mai a thlahte ni in an sawi a hei hian Muslim zingah lal angin a len tir phah a ni. Nizam lalfanu thlengin nupuiah an nei a hei hian a ring rawlh a ti zau ta hle a ni. British sorkar an rawn luh khan Nizam te nen a an inkarah thiamtakin an tlazep a duhsakna an pahnih inkar atangin an dawng nghe nghe a ni.

He thlan hi ngun takin ka en a Nizam lal zawkte thlan chu mawlmang ve tak a nih lain he thlan hi chu a ropui hle.

(Class ka nei nakinah ka rawn chhunzawm ang :-)...
Umm ka rawn let e...

He thlanah hian lungman tam thenkhat marble karah hian zeh a ni a, mahse mi thenkhat koham lutuk chuan kerchhuakin an ru bo deuh vek tawh a ni.Muslim ho thlan siamdan leh insakdan hrim hrim hi a chhip an ti zum deuh kher thin a, MA kan zirlai-a kan zirdan chuan an thlarau vanram a chho nghal tur a an ngaihvang a hetiang a sa hi an ni.

He hmun kan tlawh hnu hian NIzam's Museum kan tlawh leh a, amaherawhchu thlalak vawikhat click Rs 50/- an tih deuh talh avangin kei mirethei hian ka hmet ngam talo a. Tichuan Nizamho chenna Chowmahalla Palace kan va tlawh leh a a hmuhnawm ngei mai. Mr. Akbar hmanlai Nizam khawnbawl tupa ngei chuan hmun hrang hrangah min hruai a pu Nizam nen a an thlalak pawh min hmuh nghe nghe.

Officer incharge a fel em em a, kan titi luam nghe nghe. Ka thil hmuh a hmuhnawm leh deuh chu an rorelna hmun a ni a a mawi hle. An ngunhnamte chu a kawi deuh raih hlawm a heihi Muslim ho sakawr chung a chuang a insahnan an hman duh vang a nih hmel. Sapho ngunhnam hi chu a tlangpuiin in vihna tur a nih avangina ngil deuh a, mahse heng Muslim sipaite hi chuan a kawi deuh ngal hi an hmang tlangpui.


An ram vahna sai chunga an hlang ang deuh te pawh a nalh hle a, hmanlai car an lenna thin te pawh hmuhnawm tak a ni. Ka ngaituahna lo lang chu hmanlai an lalte ropui turzia leh hautak zia a ni. Wardrobe lian ber pawh hmuh tur a awm ghe nghe. Nizam lalte kha nitin an thawnhnaw an thlak thin ni in an sawi. Chubakah chuan zirna lam an ngaisang em em a, an nupui te khawina Harem pawh women's college a lo ni tawh a. Osmania University pawh hi a hunlai a din a ni bawk. British hunlai a Nampalli Train station an hawn lai thlalak tepawh hmuh theihin a awm bawk.

A sei lutuk dawn ka duhtawk ang e, Zarbawiha leh midang hrezawkte sawiah kan khek tawh ang e.

Chetchhiatna

Mihring nih hian chet that reng hi a har a, chetthatna han sawi hi chu a nawm viau laiin chetchhiatna han sawi hi a nuamlo duh hle. Hetia mahni chetchhiatna sawi zuah zuah khawp a mawl nih hi kala sim ta chuanglo a, keimah ber zawk hian thil thleng tawh te ka ngaihtuah kir changin lawm berhah ka tang a, ka nuih a za leh fo bawk thin.

Tumkhat chu North East Students' Forum kan university-a kan din tirh khan a hmingin Co-ordinator ka ni ve a. Ding tir a ni bawk a mi an phur tlang hle a, an hruaitu ve lah kha keive mai ka ni bawksi hahthlak duh hle. Cultural Fest lian tawk buatsaih ve kan tum a, Khuallian a tan pawh Chief Election Commissioner JM Lyngdoh ngat hman ve kan tum a ni. Amah pawh hmu lemlo in phone atangin kan in ber rem thei ta a. Kan University Hall lian ve ber chu kan book ve thawr a, mitin indaihlo takin kan buai vek a ni. Tichuan a tawi zawngin motor kan hire ve ngat a, kan khuallian lam tur chuan Khrieto naga pa pakhat nen chuan kan chhuak ta a. A awmnalai awm ka zawt a, Police Academy kawng a kal zel khan a ti mai a, driver chu ka hrilh a ngaihngam takin kan tlan ta veng veng a. Chutah le! Police Academy pahnih a lo awm chu ni in inkarki tak a lo ni bawk nen a nilo lamah kanlo tlan veng veng hi a lo nia. Kan han hrechhuak chu le..a tlai zo ta, function tan hun ni tawh si kan khualian tlai duh ngailo mi a lo ni bawknen ka koah engkim a tla ta. Rilru a hah ve duh khawp mai. Tichuan, reife kan zawn hnu chuan kan va hmu ta hram a.

Kan kal lai khan inlama ka thawhpuite khan min rawn phone ve reng a "hall an khat vek tawh..engtin nge ni dawn." ka ngaihtuah a, "lo tan phawt mai ru mipui an zahawm a, khuallian zawng ka lo hma ve mai dawn nia" ka tia, min tan san ta a. Lyngdoh meuh pawh minlo nghak rei tawh niang gate bulah a lo awm vang a, kan bo thu te chu sawi a ngaitawhlo kan hmelah a inziak vek. Pa hawihawm tak a ni a, a short cut te chu minla hrilh ta zui leh nghal hnar a lian duh hle. ka thiamloh vakah pawh ka dah duhlo a, driver pa chu ka puh ve hmiah mai a ni. Tichuan, hall kan thleng a program pakhat an tihlai a zawh hnu chuan Dias ah ka han hruai chho a, mi lah chu thutna changlo te tiamin an lo tlim hmur mai a, Professor zahawmpui pui an lo kat ve nuk ka zakru hle tawh a. Pangpar kan pe thuai a, thu kan sawitir bawk. Ka thusawitur ve darthlalang hma a ka lo in hma sek khum thin kha sawi a rem talo a ni. Amaherawhchu mithiam tihtakah a fel em em a, media an rawn bawr luai luai pawn a sawmtu ka nih avangin ka thubak chu a ngaihsak biklo. A tawpah chuan a inah kan va thlah a, thingpuisen dawmin India nuclear agreement leh student's politics te kan sawi tui leh viau si a...

Thanks a million!

Kum a thar a, hun kal tawh te ka chhuikirin Pathian malsawmna ka dawn nasat zia ka chhut a. Lawmthusawina deuh hi ziah ve pawh a tha e, ka tia. Mahse ka hlen thei lawklo! Ka ziahloh avang maiin ka lawmlo a ni chuanglo a, ka chhut neuh neuh a ka tan a a thawh zawhzai te kha lawmna awm reng a ni.

Ka inenkawl tawkna tur hna min pe a, ka phak ngailoh a ka hriat engkimah min hlangkai a. Amah avangin hetiang dinhmu leh hun hi kalo thleng ta. Mite tan chuan thil pangai a ni awm e, kei a tan chuan engkim mai hi a hmangaihna kuthnu (Signature) a tel avangin ka lawmna a zual a ni. Ka neih phakloh thlengin ka kutah min rawn hlan a. Thian thatak ka lungngaih lai pawh a min hnem thei reng te ka nei bawk a. Ka thawhpui te lah an bulah awm a nuam a, kohhran leh khawtlangah a awm tawkin min tel tir bawk. Hmangaih em em tu nu min pe a, min rawn be zing viau mahse buai em em chan pawn a aw ngaihthlak nuam ka ti tho. Ka zirna ah ka phakbakah min hlangkai bawk. Lawmloh changte lungngaih chang te chu ka nei na ve meuh mai, mahse a malsawmna nitin ka dawn ka chhiar kir hian vuina tur engmah kalo neilo. Ka tan thatna turin engkim minlo thawhsak thin a ni si a. Hetiang em a min hmangaihtu hi ka tlinlohna leh ka sual ang ang hian ka chhuang ve a, ka zahpuilo tawp a ni. Davida'n Sam a a ziah kha ka hrechhuak thin. Engvang hian nge kei ve mai hi min hriat reng thin ni. Mi tamtak tha zawk fel zawk an tam awm si a. Kumin pawh hian engpawh ti ila ka bulah a awm reng ang, hmangaih Pathian a ni si a, ka vannei thlawt a ni.

I ASKED, HE GAVE

(from email...)

I asked for Strength.... .And God gave me Difficulties to make me strong.

I asked for Wisdom...... .And God gave me Problems to solve.

I asked for Prosperity.. .And God gave me a Brain and Brawn to work.

I asked for Courage..... .And God gave me Danger to overcome.

I asked for Love........ .And God gave me Troubled people to help.

I asked for Favors...... .And God gave me Opportunities.

I received nothing I wanted. I received everything I needed.

Symphony of destruction!

Awihla awih suhla, he hla hi kan rawlthar vanglai ve khan kan ngaithla ve thin a nia aw. Metal Band pakhat Megadeth sak a ni tih pawh ka la hre thei. A music khauh tak leh in khawng chhawk chhawk rual khan lu buk kanlo tum ve a, kan buk luat avangin a thu lam kalo ngaihtuah chiang ngailo. Lu buk sawi takah chuan kan nau pakhat Rock star Vanapa Hall a concert ve pawh tumkhat an in ka zuk leng chu a pi hian tuilum hian a nghawng a lo deh sak a, tihtakzetin kan nui! Ni e, kan bukpui a hi nghawng kham urh si hian kanlo hrelo hle thin. Tun khawhnu a tihtur em em ka neihloh chang a ka han ngaihtuahlet leh hian thu thatak tak a lo in zep ve nual nia. Chhiatna rimawi thlentu hla chuan eng hla tha han chhuah ang i maw? zawhna awm thei tak a ni.

(An kutzungtang posi hi chu buai vak lo ila :-)
Ka ngaihtuah let leh hian Politician leh mipuite inkar ngun tak a hrutna a lo ni ve tho mai. He hla engah hian kan politics kan thlir daih dawn a ni. A hla ang hian thithei nangmah ang tho kha hruaitu a tan chuan i han thlang phawt a, thilti thei tak a nih avangin pathian ang hialin an lo lang ta hial a. Tichuan mipui ngaihtuahna chu a su kual vel ta a ni. Robot ang mai in awm thlap thlapin a rawn che vel a.A rilru tenawm tak chu a tawpah chuan a lo puak keh ta a....(Enge a dang kha?) Phaiphuleng ham thiam ang mai khan mipuite diklo takin kawtthlerah te a hruai vel a. Keini mipui lah chu milem duh duh a khawih chet theih ang maiin kan awm bawk nen. A tawpah chuan chhiatnaah min rawn thlen nge nge thin. Khawvel chu a rawn nghing dawt dawt a, khawvel chakna te a rawn tla a, vanin ro a rawn rel a, a tawpah chuan zallenna duh mifelte an rawn ding chang thin.... tih vel ni ta in ka hria.

Buk pui a tan chuan hla tha ve tak a ni. A sawi ang chiah hian mihring famkim lo ve bawk kan thlang tling a. Roreltu te chu Pathian ruat an ni ti thin mahila, an rorelna hian mipuite lung a dum zan thinlo. Thuneihna a pumhmawm hnuah phei hi chuan lalna an duh tawkin an hrawt ta thin a. Chu chuan mimal nun leh khawtlangnunin a ti hlemhle a. Kan zavainun a rawn ti chhe ta a ni. Mahse Van thinurna kan tawn hunah chuan mi duham leh misualten hmun an chang tawhlo ang a, dikna leh felna duhte an rawn dingchhuak ve tawh dawn a ni.

Tears! (The language well spoken)

Khawvelah kan han chhuah phat atangin mittui sengin kan tap chhuak a, kan thihni in kan bul a mite mitui kan ko chhuak leh thung. Mihringnun hi mittui leh mittui inkar mai ah kan lo awm reng zawk em ni ang le?

Ngaihtuahna seng thei, lawm thei, lungngai thei, thinrim thei, hlim thei, zak thei mihring a siam kan ni miau a, hetiang hun a lo thlen hian a vawrtawpah chuan kan dan zawh rual loh hian a a lo hnam chhuak leh thin. Mittui tlakna chhan chi hrang hrang te hi Basal tears, Reflex tears,psychic tears te in mithiam te chuan anlo then a. Ni e, mitmim vang te pawh hian a tla ve leh bawk thin e. Bike a ka tlan chak deuh hian ka mittui hi a lo tla leh zawih zawih fo bawk thin.

A engpawh chu ni rawhse a pathumna psychic tears kan tih mai hi ka ngaihtuahna ti tam tu chu a lo ni ta a ni. Hmanni chu youtube ah hian British talent show a naupangte zaithiam zet mai Connie Talbot zai hi ka thiante nen kan ngaithla a, a judge hmeichhe pakhat a hming (kalo chhinchhiahlo pek a)chuan a zaithiam em avangin a hla sak chuan a vel nge ni, a mitui a tla zawih zawih a, keini tak pawh chu kan lo awmthiamlo hle ve tho a. Heilo pawh hi zahluat avang pawh hian a tah zawih zawih theih tho mai. Lawm avang a mittui luang zawih zawih han hmuh hi a nawm laiin lungchhe vankai a mittui sur zung zung te ena hreawm thung. TAP thei a kan awm hi mihring minti mihringtu a ni. Leh lamah chuan hreawm tawpkhawk ve bawk chu mahni hmangaih ngawih ngawih chhungte thenlai a mittui tlak theih miahloh chhung lam a hnawhtu a awm hian puahdarh a va chakawm awm thin em.

Lehlamah chuan mitui hi hnehna a lo ni ve bawk a, mahni hmangaih em em te'n mittui hnam par a thu tam awm silo a thutam an sawichinah hi chuan pa rorum Napolean, Hitler te pawh tui angin an nem duai zel a lawm. Mittui hian mahni mai nilo midang ramah tepawh hian hnehna a lo chang zel a. Bill Clinton American President-in a an ram sipai thi te sunna a a thusawi mittui luang ngiai ngiai chuan American mipui te thinlung a hneh a, vote tamtak a hui ngei bawkin ka ring. Hetih lai film pakhat Van Helsing Film-ah khan A Dracula ber kum tamtak dam tawh thi hlei theilo khan ti hian a changtupa hnenah chuan ti hian a sawi a, "hlim awmzia hi ka hrelo a, hlimloh awmzia pawh ka hre hek lo, lungaihna ka hre chuang heklo a" tiin a nun blank zia a sawi a. Ni e, Hetiang mihringnun a pawimawh ber mai neilo a kum za tam dam hian mihringnunah awmzia a nei nep a, hetiang nunzia kan nei hi kan tan malsawmna a ni. Mihringfapa meuh pawh natna hremi leh lungngaih hre mi a nih ve bawk tak kha. Lazara a thih khan a ni meuh pawh mittui tla in a tap ve hial a!

He thihna luiral kan kai meuh hunah chuan TAHNA awm tawhlohna vanramah kan kai dawn a. Keichu he ram ropui a kan thlen hun pawh lawmna vang tal a mittui tlak chu ka la thlang ta fan nia!

Keimah leh Keimah!

Thian duh tak e tilo hian mahni leh mahni ka inkawm chang a awm fo thin. Ka inkawm tui lai phei chuan tudang vak mah hi ka mamawh lemlo a. Mahni khawvelah hian kalo leng leh veng veng thin. Ngaihtuahna khawvel a chen hi a nawmna chen a awm ve bawk a, i duhthusam ang ang khan i awm mai thei a, i duh chuan lal ber i nia a chang chuan thulo berah pawh i in dah thei bawk. Mahse ngaihtuah fuhloh chang a awm hian kan buai ve nuaih tho mai. Mahni leh mahni hi kan han in nuih leh suih fo chang a awm a. Duhthusam ramah kan cheng veng veng a, ngaihtuahna ram atang a kan rawn let meuh chuan khawvel chu a ngaite bawk a lo ni a, a va han buaithlak thin em. Suangtuahna khawvel leh khawvel taka ka tih pawh chu a eng zawk nge dik tak zawk ni ang? ka rilru ngaihtuahna in a dik a ka hriat kha a dik chu a nimai a, tizawng hian ngaihtuahna han seng ta ila a zia phian lawng maw? Dik kan tih hi kan awmna khawtlang leh kohhranin a a siam mai nge ni a, dik hi chu a mahin a awm ve hrim hrim nge kan ngaihtuahnaah hian a awm sa. Naupiang hlim chuan engmah dik leh diklo a he bik silo a, dik chu khawvelah a lo awmsa mai em ni? In zawt duh suh chhanna a awm chuanglo. Khawvel a ni miau a!

Mihring minti mihringtu

Mihring min ti mihring ber tu hi ka chhut ve fo thin a, engtak niang maw? Kan chhia leh tha hriatna leh kan thinlung hian kan khawvelah hian engang takin nge hmun a luah thuk ang tih ka ngaihtuah thin. Chhia leh hriatna in awmlo a tih thleng hian kan thinlung hian min nawr chang a nei a, a chang chuan mi a ang mai hian awmlo pui pui kan tih awm a mawilo hi kan ti leh mai thin. Mahse hetiang a kan awm hi mihring kan nihna lo tichiangtu alo ni reng a! Computer ang a program chawp ngai nilo, robot ang a tha chauh thliar hrang kan nih chuan mihring kan nihna kan hlenlo a ni. kan han tap hlawp hlawp te, kan han nui hawk hawk te hian mihring minti mihring a a lo ni.Dik thliam thliam a chet te hi a lo har, kan han kalh nawk nawk te pawh hi mihring kan nihna ti chiangtu anlo ni vek mai. Khawvelhi chu a nuamin ava han hreawm si em...buaithlak tak a ni.

Eng ber nge thar kumtharah chuan?

A ngai bawkin ni a chhuak a a ngaite bawkin a tla leh a, chu chu kan nghahleh em em kumthar chu a ni. Zawhna hotak ka inzawt a, enge kumthar ti kumthartu chu? Engvangin nge kumhlui chu a hlui bik? Mmmmm...zawhna ho lam tak tak hi awm awl deuh chuan a rawn lut duh teh chawk a. Ka phak tawkin ka ngaihtuah ve a mihring nunah hian HUN nge pawimawh THILTIH? A pawimawh zawk sawitur avanga kal thiang rial awm zawk, hun hriatreng tlak a siamtu chu kan thiltih hi a lo ni ta a ni. Kum kal tawh kan hriatrengna chhan chu kan thiltih that leh chhiat vang a ni. Nikum lam pawh khan thil thalo leh thil tha tih kan nei teuh ang a, chuvang chuan kumin pawh hian a chhia leh tha pawh a awm nawk bawk ang. Engpawhnise theihtawp a hun hman that hia a lo pawimawh ber mai. Kumtharah chuan thil tha thar engtak nge ka tih dawn tih i inzawtnawn fo ang u.

Footnote leh Reference dah a tul em?

Thil ngaihmawh ve deuh ka nei a chu chu kan ziaktu zinga ngaihsanawm ve a ka hriat Lalhmingliana Saiawi leh Ruatfela Nu hian an lehkhabu thuhmahruai lamah footnote ang emaw reference(lehkhabu rawnte) an ziah duhloh thu leh an ngaihsan vakloh thu an rawn sawi a. Hemi bakah hian Rev. K.LungMuana khan a seminar paper ngeiah ama irawm a ziak mai a nih thu leh reference a dah duhloh thu a sawi bawk.

Ka ngaihve dan ka han sawi ang e. Lehkhaburawn te hi a bu pumpui kan chhiar vek ngailo a, a bung a zirin kan duh zawng kha index atangin kan zawng mai a. Chubakah chuan tawng engemaw sawifiah ngai paper pangai a leng remchang silo chanchin ziahnan pawh footnotes emaw end notes emaw ah kan ziak mai a. Hei hian kha thu ziah kha a ziaktu ziah mai baka chhui zau a duh chuan a en ve mai thei a remchang phian. A style format an thiamloh vang nge hetiang a han tih leh tlat mai hi a changkang lemlo khawp.Standard tak lehkhabu kan la neilo pawh hi mumal deuh a thil ziah kan peihloh vang pakhat hi a ni. Lehkhabu pakhat ve lem khawrpum lai a engmah bar chhiarlo a tapchhak ti ti mai ziah hi kan ngaisang tawh lemlo. An mahni experience tak tak pawh nise han inchhiarzau bawkse a ngaihnawm leh zualin ka ring.Mahni hi inti fing lemlo ila midang thuleh hla te pawh hi ngaithlain interview engemawzat pawh an lehkhabu ziahnan hian han ti nghe nghe se, lehkhabu awmkhauh tak a ni ve thei zawk ang. International Journal a an editors te hian kan ziaktute anglo takin an han ngai pawimawh khawp a, footnote chikim an check peih a, thubelh chian dawl lo deuh te phei chu ziah ngam chi pawh a nilo. Ziaktu lar Arundhati Roy te, Choamski te, Jacques Derrida te, Michel Foucoult te hian an ni anglo takin an uar viau. A hranpa ngatin website ah pawh an footnotes download theihte'n zuk dah a! Thil tak tak kan ziah dawn chuan kan taima tur a ni. Kan hmang duhlo a nih chuan hmanloh mai sawisel kher a ngailo.